Mjeku Artan Koni tha mbrëmjen e sotme në emisionin “Tempora” se duhen shtuar testimet, pasi situata në kushtet aktuale është alarmante.
Koni tha se nuk mund të vazhdohet më me format e deritanishme, duke testuar maksimumi 400 persona, ndërkohë që duhej të testoheshin 2000 apo 5 mijë persona.
“Pse nuk testohen 5 mijë persona, s´ka tamponë? 1 tampon kushton 5 apo 10 euro, ndërkohë që Qeveria jep me koncension 20 mln euro për 1 km rrugë.
Dmth lekët nuk mungojnë.
Kënaqemi kur na dhurojnë 10 apo 20 respiratorë, kur 1 respirator kushton 1 mijë euro. Atëherë pse nuk blihen respiratorët?
Sot një mjek në Kamëz doli pozitiv ndaj Covid-19, ndërkohë që stafi mjekësor nuk testohet, pse?”, u shpreh Koni.
Sipas tij, e gjithë kjo situatë nuk mund të përballohet me politikat e ndjekura deri më tani.
“Personat që dalin pozitivë duhet të karantinohen, por atyre duhet t´i sigurohet paga, ushqimi, të ardhurat, sepse nuk mund të jetojnë pa punë.
Pra Qeveria krahas testimeve, duhet të garantojë mbështetjen ekonomike, ashtu sikundër po bën Europa”, tha Koni.
