Arrestohet mëngjesin e sotëm ish-kryetari i Bashkisë së Vorës, Agim Kajmaku.
Arrestimi
Kajmaku mësohet se u arrestua në një spital privat në kryeqytet. Burimet policore thonë se Agim Kajmaku u shtrua gjatë mesnatës në spital, ndërsa ka qenë avokati i tij që lajmëroi policinë. Më pas, uniformat blu bënë të mundur arrestimin e tij. Raportohet se Kajmaku u paraqit në spital në gjendje të rënduar, pasi vuan nga diabeti.
“Nga specialistët e Seksionit për Hetimin e Korrupsionit në Drejtorinë Vendore të Policisë Tirane u krye ekzekutimi i urdhrit të prokurorit, për ndalimin e shtetasit në kërkim: Agim Kajmaku, 49 vjeç, banues në Tiranë. Ndalimi i këtij shtetasi u bë pasi Prokuroria e Rrethit Gjyqësor Tirane ka dërguar urdhrin e ekzekutimit të datës 9 Nëntor 2019, bazuar në vendimin e Gjykatës së Rrethit Gjyqësor Tiranë, e cila i ka caktuar masën e sigurimit personal ‘Arrest në burg’, për veprat penale ‘Falsifikimi i vulave, i stampave ose i formularëve’, ‘Falsifikimi i dokumenteve zyrtare’ dhe ‘Kryerja e funksionit pas dhënies fund të tij’. Ekzekutimi i vendimit penal është bërë në ambientet e një spitali privat në Tiranë, ku aktualisht ky shtetas po trajtohet me ndihmë të specializuar mjekësore. Materialet do t’i kalojnë për ndjekje të mëtejshme Prokurorisë së Rrethit Gjyqësor Tiranë”, njoftoi policia.
Akuzat
Ish-kryebashkiaku ishte në kërkim policor prej Nëntorit të kaluar dhe po gjykohej në mungesë për akuzat: ‘Falsifikimi i vulave, i stampave ose i formularëve’, ‘Falsifikimi i dokumenteve zyrtare’ dhe ‘Kryerja e funksionit pas dhënies fund të tij’.
Agim Kajmaku u denoncua nga Partia Demokratike për fshehje të dënimit në formularin e Dekriminalizimit, pasi nën emrin Jorgo Toto, ishte dënuar në Greqi për falsifikim parash. Pas hetimeve dhe verifikimeve nga Prokuroria, akuzat e opozitës rezultuan të vërteta, duke bërë që KQZ ta shkarkojë atë nga detyra e kryebashkiakut.
Akuza tjetër lidhet me shkarkimin nga Kajmaku të dy nënkryetarëve të Bashkisë pasi KQZ i kishte hequr mandatin.
Ndaj tij, gjykata e Tiranës ka caktuar masën e sigurimit “arrest me burg”, por që deri më tani ishte e pa ekzekutuar.
Në disa seanca gjyqësore, avokati i Kajmakut ka kërkuar shuarjen e masës, por kërkesa është refuzuar nga gjykata.