Mjeku Hysni Shkjau nuk arriti që të fitonte betejën me COVID-19. Prej 40 vitesh, ai punonte si mjek familjeje, në qendrën shëndetësore Qafë-Mali në Bashkinë Fushë-Arrëz të Pukës dhe ishte në krye të detyrës, deri ditën që u infektua nga COVID-19.
Një humbje të madhe për sistemin shëndetësor, e quajnë kolegët e tij në Pukë, teksa i shprehin ngushëllime familjarëve.
Sipas “Report Tv”, mjeku u infektua nga infermierja e qendrës shëndetësore ku punonte në Pukë, e cila më herët kishte shkuar në QSUT për një konsultë dhe ku dyshohet se u infektua me koronavirus.
“Dr. Hysni Shkjau, 69-vjeçar, me 40 vite eksperiencë, nuk e kishte ndërprerë punën dhe vijonte të shërbente si mjek familje në qendrën shëndetësore Qafë-Mali në Bashkinë Fushë-Arrëz të Pukës. Luftonte prej disa ditësh me COVID-19 në spitalin infektiv dhe gjendja e tij u rëndua si pasojë e vështirësisë në frymëmarrje dhe disa sëmundjeve bashkëshoqëruese. Ministria e Shëndetësisë i shpreh ngushëllime famljarëve, miqve dhe kolegëve. Është një humbje e madhe për sistemin shëndetësor, humbja e një mjeku që i ka shërbyer me përkushtim e profesionalizëm për 40 vite komunitetit të tij” njoftoi më herët gjatë ditës Ministria e Shëndetësisë.
Sipas MSH, 79 persona e kanë humbur betejën me koronavirusin e ri në vend.
