Partizani ka reaguar me anë të një deklarate zyrtare referuar zërave se klubi i kuq po kërkon pasardhësin e trajnerit aktual të klubit,Adolfo Sormani.
Kampionët në fuqi të Superligës, kanë dalë në mbrojtje të teknikut italian duke përgënjeshtruar hipotezat apo lajmet e fundit.
Duke vlerësuar maksimalisht figurën e Ilir Dajës, trajner i cili përflitet për një kalim te Partizani në përfundim të sezonit, klubi kryeqytetas thotë që vëmendja është përqendruar në përfundimin në mënyrën më të mirë të sezonit aktual dhe se duhet respektuar gara.
Reagimi i Partizanit:
“Nisur nga lajmi që prej ditësh po qarkullon në media dhe portale të ndryshme në vend, FK Partizani ka detyrimin moral përkundrejt opinionit sportiv, por sidomos ndaj punonjësve dhe tifozerisë së skuadrës për të përgënjeshtruar lajmin se klubi është në kontakte me trajnerë të tjerë për të marrë drejtimin e ekipit
“FK Partizani dëshiron të informojë, sqarojë mediat dhe sportdashësit, se stafi teknik gëzon besimin dhe mbështetjen e drejtuesve të klubit për të punuar të qetë në arritjen e objektivit të mbetur në këtë sezon jo normal si ky i këtij viti, i kondicionuar thellësisht nga situata e krijuar prej pandemisë”.
“Saktësojmë se këto lajme nuk bëjnë gjë tjetër përveçse tentojnë të shpërqendrojnë ekipin nga detyra për ta mbyllur këtë fund kampionati me përpjekjet maksimale. E vlerësojmë dhe respektojmë trajnerin Ilir Daja për atë çka arritur në drejtimin e mjaft ekipeve në kampionatin tonë, ashtu si respektojmë dhe klubin e Skënderbeut për kampionatin dinjitoz që po zhvillon, por ky reagim i yni vjen për të respektuar garën dhe mos prishur kurrsesi ekuilibrat në këtë fund sezoni”.
