Kryeministri Edi Rama tha se opozita parlamentare nuk po konsiderohet si mbetje e përkohshme e këtij Kuvendi, sikundër nuk po bëhet një dallim mes atyre që janë jashtë parlamentit dhe atyre që ndodhen në këtë sallë.
Duke marrë fjalën në seancën parlamentare, pasi deputetja Rudina Hajdari i kërkoi të shprehej lidhur me listat e hapura, Rama tha se nuk do të kërkohet as rruga e diversionit dhe as ajo e numrave për miratimin e reformës zgjedhore.
“Na thoni se sot kjo është një lojë e Damianit me Oerdin apo e imja me Lulin dhe pastaj na akuzoni se po tentojmë të blejmë votat.
Zonja Hajdari ju keni firmosur vetë marrëveshjen, mbi të cilën është ndërtuar edhe puna e detajuar mbi ndryshimet në Kodin Zgjedhor.
Ne na takon si forca më e madhe politike që të përpiqemi deri në fund që të krijojmë një konsensus që në fund ndoshta, jo çdo palë do të marrë gjithçka që kërkon.
Ata që janë jashtë dërgojnë edhe ultimatume mbi atë që duhet të bëjë Kuvendi, ndërkohë që harrohet se edhe PS duhet të thotë diçka.
Nuk do të thotë që pakica e ndarë në dy pakica të kërkojë dhe të marrë gjithçka, flisni në emër të popullit, ndërkohë që vullnetin e popullit e përfaqësojmë ne.
Nuk është nevoja të vijohet me provokime qoftë nga jashtë qoftë nga brenda. Ata që janë jashtë nuk kanë tagër të lëshojnë urdhëra dhe ultimatume.
Sot na u lëshua urdhëri nga Sekretari i Përgjithshëm i Forcave Çlirimtare ku i thuhet se Kuvendi duhet të miratojë këtë marrëveshje pa vonesa dhe pa ndryshime.
Vetëm Gjykata Kushtetuese mund t’i drejtojë Kuvendit urdhëra. Ju shkoni 4 veta në një rezidencë, hartoni një listë dhe thoni që Kuvendi duhet ta miratojë këtë që ju keni dakordësuar. Pra Kuvendi duhet ta marrë këtë letër dhe ta miratojë, thoni ju”, tha Rama.
Kryeministri tha se listat e hapura e ndërlikojnë procesin e administrimit të votës dhe nuk mendoj se po të aplikohen do të bëjnë hatanë.
Rama tha se nëse aplikohen listat e hapura nuk do të dimë se kur mund të përfundojë numërimi i votave.
Sipas tij, është e vërtetë që opinioni publik ka një mendim se listat e hapura mund të demokratizojnë jetën politike.
