Kryeministri Edi Rama duket se ka nisur një pazar në Kuvend lidhur me reformën zgjedhore. Duke marrë fjalën gjatë seancës parlamentare, Rama ndërsa po fliste për reformën tha se palët s’mund të pretendojnë të marrin maksimumin nga ky proces.
E ndërsa tha se ishte i gatshëm të fliste për listat e hapura, duke iu drejtuar deputetes Rudina Hajdarit, tha “a do të pranoni ju faktin që komisionerët të jenë politikë, sepse ne si PS jemi me dy krushqi, njërën me ata që janë jashtë, dhe tjetrën me ata që jeni në këtë sallë”.
Në vijim Rama tha se “ne s’mund të çbëjmë atë që kemi arritur me një marrëveshje, e cila është firmosur në mos gaboj edhe nga znj. Hajdari. Pasi nëse do e çbëjmë këtë marrëveshje, atëherë ai lepuri, që shfaqet si luan, mund të kthehet në mace dhe mund të mos hyjë në zgjedhje”.
“Ju zonja Hajdari dhe Murrizit u takon një reflektim, që ne e kemi respektuar jo vetëm me fjalë por më të gjitha rregullat nismën tuaj. Duhet të reflektoni që ky është një proces, që konsensusi duhet të provojë një rezultat për Shqipërinë, ku cdo palë duhet të bëjë koncesionet e veta.
Unë nuk besoj se listat e hapura nuk mund të bëjnë mrekullira dhe te efektet çudibërëse të tyre. Për mua ato e komplikojnë procesin e administrimit të votës. Besoj që në këtë fazë na takon që ta bëjmë një diskutim, por që nuk mund ti vendosim njëri tjetrit kushte, dhe të mund të shmangim provokimet. Unë kam krushqi jo vetëm me Lulzim Bashën, por edhe me ju”, u shpreh Rama.
Në vijim, ai tha se PS nuk i ka votat për të miratuar Kodin Zgjedhor, pasi kërkohet një shumicë e cilësuar, ndaj dhe nëse do të vijohet me ultimatum apo kushte, ne mund të ikim nga Parlamenti dhe t’ju lemë juve këtu dhe Kodi të mbetet ai që është.
