Trajneri i Kukësit, Orges Shehi, ka folur në prag të sfidës që skuadra e tij luan ndaj Teutës, e vlefshme për aktin e parë gjysmëfinal të Kupës së Shqipërisë.
Shehi ka deklaruar se skuadra verilindore lufton për të dyja frontet duke mos i humbur shpresat te titulli kampion.
Gjithashtu, ish-portieri ka vlerësuar maksimalisht “Djemtë e Detit” dhe kërkoi nga të tijtë që të luajnë me përqendrim, duke qenë se asgjë nuk do të përfundojë nesër.
Sa e rëndësishme është ndeshja e parë e Kupës?
Është e rëndësishme, pasi është ndeshje gjysmëfinale mes dy klubeve që janë në pjesën e sipërme të klasifikimit. Janë dy skuadra që kanë ambiciet e tyre por duhet të theksoj se kam parë kundërshtarin që po bën mirë kohët e fundit. Pra, është një ndeshje e rëndësishme dhe mendoj se e kemi përgatitur në mënyrën e duhur duke pasur parasysh që nuk mbaron nesër, por ka edhe ndeshje kthimi.
Nesër është më e rëndësishme të shënosh apo mos të pësosh?
Nesër e rëndësishme është të jesh i kujdesshëm, të jesh në ekuilibër duke pasur parasysh që nuk mbaron nesër. Janë të rëndësishme të dyja fazat.
Si është gjendja fizike e skuadrës?
Patjetër që kemi vështirësi duke luajtur çdo tre ditë dhe skuadra ka ngarkesë pasi është po ai grup lojtarësh vetëm me dy apo tre ndryshime. Jemi munduar që të hedhim në fushë emra të ndryshëm për të pasur një kontigjent që i përgjigjet të dy trofeve si Kupës ashtu edhe kampionatit. Kështu, këto ditë jemi munduar ta riaftësojmë skuadrën për nesër.
A është Kupa shpëtimi i sezonit?
Unë jam teknik dhe tekniku ka për detyrë të fitojë çdo ndeshje, të përgatisë skuadrën për të fituar çdo ndeshje. Nuk jam zyrtar i klubit për të thënë është shpëtimi i sezonit apo jo, tekniku flet për ndeshjen në anën teknike. Është një trofe i rëndësishëm për ne, si Kupa si kampionati kështu që do luftojmë në të dyja derisa kur të mos kemi mundësi, sidomos në kampionat ku është edhe matematika në mes. Kurse në Kupa janë dy takime që të çojnë në finale dhe kanë vlerësimin e duhur nga ne” tha Shehi.
