Duke përmendur faktin se mjeku hematolog, Arjan Pushi, ndodhet i intubuar në Spitalin Infektiv, i prekur nga koronavirusi, ish-deputeti i PD Bardh Spahia i ka bërë thirrje Ministrisë së Shëndetësisë që të reagojë dhe të marrë masat që të këpusi zinxhirin e infeksionit në QSUT.
Përmes një njoftimin në rrjetet sociale, Spahia thotë se është skandaloze dhe kriminale sipas tij bërja e tamponëve si qokë.
“Nuk mund të kursehen tamponët për ata që kanë nevojë!!!”, thekson Spahia.
Sipas tij, është kriminale se si akoma sot, 4 muaj mbas fillimit te emergjences është zero investimi për rritjen e kapaciteteve testuese, asnjë investim për një laborator të ri, asnjë investim për sigurimin e numrit të mjaftueshëm të testeve, asnjë investim për garantimin e mjeteve mbrojtëse për mjekët apo sigurimin e maskave të mjaftueshme për qytetarët shqiptarë.
“Me 7 shërbime të infektuara, QSUT është kthyer në një vatër të nxehtë përhapje të virusit dhe përgjegjës nuk janë qytetarët, por vetë ministria e shëndetësisë që po menaxhon këtë situatë!
Reagoni zonja ministre, merrni masat që të këpusni zinxhirin e infeksionit në QSUT, sepse është i pafalshëm infektimi i personelit mjekësor, por edhe i pacientëve në një strukturë shëndetësore publike!!!”, shkruan Spahia.
