QSUT “shpërndan” COVID-19, jemi në prag kolapsi

Nga BoldNews.al

Duhet të ishte institucioni dhe dera ku futesh i sëmurë dhe kthehesh i shëruar, por QSUT është kthyer në vatrën më të rrezikshme në vend për infektimin me koronavirus. Nga 18 Maji deri më tani, vetëm nga Qendra Spitalore Universitare Nënë Tereza janë infektuar 84 mjekë, infermierë dhe personel tjetër ndihmës. Kjo është shifra e çmendur që kalohet lehtë nga ministrja e Shëndetësisë Ogerta Manastirliu dhe kryeministri Edi Rama.

Burime të Boldnews.al konfirmojnë se në shumë raste kur personeli i prekur ka kërkuar kryerjen e tamponit, ajo nuk është bërë në kohë, madje u është refuzuar. Personelit i është sugjeruar nga qendra e emegjencës që të qëndrojnë për tre apo katë ditë në shtëpi dhe nëse përmirësohen nga ana shëndetësore, të vijojnë punën. Pikërisht kjo situatë duket se ka nxitur përhapjen e koronavirusit në ambientet spitalore.

Gjendja është në prag të kolapsit në QSUT, ku sot u regjistrua viktima e 49 nga koronavirusi, ndërsa shtohet me orë numri i pacientëve që kanë nevojë për ndihmë të specializuar në Spitalin Infektiv në Tiranë. Burime të “Boldnews.al” thanë se nëse vijon ky ritëm, atëherë pritet që brenda tre javëve të jemi në limitin e trajtimit të pacientëve. Në këtë rast nuk bëhet fjalë për mungesë të shtretërve, por nevoja për pajisje respiratore, që njihet edhe si terapia intensive apo faza e fundit, që është intubimi.

Ka një proces zinxhir të përhapjes së koronavirusit nëpër pavionë, ku në fillim janë shfaqur dy apo tre raste me “COVID-19” dhe pikërisht për shkak se nuk u është bërë tamponi në kohë për ditët që kanë qëndruar në punë ua kanë përhapur virusin edhe kolëgëve, apo edhe më rëndë pacientëve që ndodhen në pavionë të ndryshëm.

LEXO EDHE  Faqja e njohur: 15 plazhet e Shqipërisë që duhet t’i vizitoni në 2020

Janë me dhjetëra raste që pacientët të cilët vijnë për një sëmundje tjetër për trajtim, janë infektuar pikërisht në ambientet spitalore më “COVID-19”. Disa prej tyre fatkeqësisht kanë humbur jetën, por askush nuk po mban përgjegjësi.

Mungesa e tamponëve është një nga shkaqet kryesore të përhapjes masive të koronavirusit, ku janë disa pavionë të cilët mbajnë rekord, dy prej tyre mbesin reparti i Hematologjisë dhe ai i Kardio-Kirurgjisë, ku thuajse i gjithë përsoneli doli i infektuar dhe për pasojë koronavirusi kaloi edhe tek pacientët.

Një tjetër arsye e kësaj katasrofe që po ndodh çdo ditë në QSUT është edhe mungesa e mjeteve mbrojtëse. Personeli bën kërkesë për maska dhe mjete të tjera por nuk jepen nga farmacia e spitalit në sasinë e kërkuar, edhe pse janë bërë herë pas here tendera miliona euro për pajisjen me mjete mbrojtëse.

Kryeministri Edi Rama ndoqi praktikën absurde me mbylljen e popullsisë të gjithë nëpër banesa për rreth dy muaj duke treguar forcën me parimin izolim-ndëshkim dhe jo testim-testim! Me hapjen e madhe, edhe virusi u përhap frikshëm, sidomos në institucione shëndetësore apo ato shtetërore. Pasojat janë të rënda dhe ndodhemi në pragun e një katastrofe, krejt ndryshe nga vendet e tjera në Europë. Kudo ka ulje të numrit të të infektuarve në vendet e Bashkimit Europian, ndërsa në Shqipëri po ndodh e kundërta, pikërisht nga “strategjia qeveritare” që edhe taponët i ofron me miqësi.