Sevilla dhe Barcelona u ndalën në një barazim pa gola në “Sánchez Pizjuán”. Skuadra katalanase zhvilloi një lojë të dobët poshtë pritshmërive madje, po të mos kishte një portier si Ter Stegen, do të ishte ndëshkuar më shumë se dy herë.
Në përfundim të ndeshjes, Quique Setién ka analizuar me qetësinë e tij të zakonshme lojën e nxehtë dhe skenat nervoze të të tijve në këtë transfertë:
“Kemi provuar në shumë mënyra, por nuk mundëm t’ia dilnim. Është e vërtetë që portieri na shpëtoi në dy-tri raste. Të kesh Marc në portë është garanci e madhe. Është gjithashtu e vërtetë që kemi pasur edhe ne disa raste.”
“Nuk po them se kemi të njëjtat mundësi për titullin, por Real Madridi do të duhet të fitojë në “San Sebastián”, do të ketë akoma shumë ndeshje delikate. Realiteti është që ne jemi mirë, jam i kënaqur me shumë gjëra, por duhet të përmirësojmë disa të tjera. Unë jam akoma po aq optimist. Isha i sigurt, dhe jam akoma, që asnjëra nga dy skuadrat e kreut nuk do t’i fitojë të gjitha ndeshjet e mbetura. Jam i sigurt që edhe rivali ynë, gjithashtu, do të ndalohet në vazhdim”.
