Deputeti Lefter Maliqi i është përgjigjur kryeministrit Edi Rama, duke e paralajmëruar se, “dhelprën me dy koka do e shikosh shumë shpejt”. Se çfarë nënkupton “dhelpra me dy koka”, Maliqi tha se do e sqarojë shumë shpejt.
Një ditë më parë nga foltorja e Kuvendit, Rama sulmoi Maliqin.
“Kur vjen puna te koalicionet mos më bëni të flas. Është një deputet këtu që nuk ka votuar as për veten e vet, ka ardhur këtu deputet, i PD-së, ka bërë fushatë për mua për PS-në, mes dy kohërave ka kapur një drejtori”, tha Rama.
Këtë të Premte, Maliqi, në një prononcim për gazetarët, tha se Rama ka vjedhur dhe mashtruar shqiptarët, ndërsa paralajmëroi se do ia thotë në sy pazaret që sipas tij, kryeministri ka bërë në kurriz të shqiptarëve.
“Nëse është burrë, sot nis deklaratat për të, pasi do e nxjerr lakuriq atje para Kuvendit siç është. Mos të kujtojë se ka vdekur Prifti dhe s’ka më kaseta. Filmimet dhe kasetat tek Dashi i Pezës nuk mungojnë. Dua t’i them se ai i infiltruari që ka qenë në grupin e zjarrit dhe ka qëlluar, duhet të hetohet. Paketorin e ke aty o palaço. Paketorin që vjedh paratë e shqiptarëve. Drejtorin e burgjeve e ke po aty. Ky njeri që kërcënoi me mesazhe zotin Basha ka frikë nga koalicionet. E vetmja mënyrë është grisja e marrëveshjes në Ambasadën Amerikane. Jo këta po çfarëdo partie të krijojë nuk fiton dot përballë shqiptarëve të ndershëm. Për t’i dhënë edhe një përgjigje edhe më të sinqertë dhelprën me dy koka e di shumë mirë ai. Është shprehja e tij në një grup të madh pazarxhinjsh. Do t’ia them të gjitha ballë përballë. Tani u hapën letrat. Është mosmirënjohës. Ky njeri duhet të marrë fund. Ky nervi im është i sinqertë, i drejtë. Ku të dojë të përballet, në votë dhe parlament. Mos t’iu duket se është trim, se aktron dhe me ju, bën batuta, batuta krimi. Është kriminel, është sharlatan, një belkëputur. Kujton se do blejë vota”, tha Maliqi.
“Ky është një mosmirënjohës ndaj shqiptarëve. Ka frikë nga koalicionet dhe përdor opozitën e re, s’është për lista të hapura”, shtoi Maliqi. Deputeti tha se Rama “do iki me turp”.
Duke iu përgjigjur gazetarëve, Maliqi tha se përfaqëson opozitën jashtëparlamentare në Kuvend.
