Kobe Bryant dhe vajza e tij Gianna së bashku me 7 persona të tjerë, humbën jetën më 26 janar në një aksident tragjik me helikopter.
Për sa i përket rrëzimit të mjetit fluturues, në një raport të ri të publikuar nga mediat amerikane, mësohet se piloti nuk ka munduar të bëjë një koordinim të saktë me kontrollorët e trafikut, shkak ky që mendohet se ka çuar në aksidentin fatal.
Mjegulla e madhe dhe moti i keq ia bënë të pamundur shikimin, derisa piloti Ara Zobayan nuk u raportoi siç duhej kontrollerëve. Zobayan u raportoi kontrolluesve të trafikut ajror se po ngjitej në 4,000 metra për të arritur mbi retë kur në të vërtetë, helikopteri po ulej duke iu përplasur një kodre në veriperëndim të Los Angeles.
Raporti nga Bordi Kombëtar i Sigurisë së Transportit thotë se Zobayan mund të ketë “keqkuptuar” bisedën me kontrolluesit, gjë që mund të ndodhë kur një pilot është i çorientuar dhe ka një shikueshmëri të ulët.
Raporti i fundit përmban 1.700 faqe, ndërkohë që arsyeja e vërtetë dhe e plotë që shkaktoi përplasjen e helikopterit do të dalë në një raport përfundimtar në fund të vitit.
