15 Korriku është data përfundimtare për mbajtjen e zgjedhjeve parlamentare në Maqedoninë e Veriut.
Lajmin e dha kryetari i LSDM-së, Zoran Zaev në një konferencë për mediat nga ku bëri me dije se kushtet e VMRO-DPMNE-së janë pranuar dhe kjo datë është e pranueshme për OBRM-PDUKM-në, të cilën ai tashmë e ka diskutuar me kreun e opozitës, Hristijan Mickoski.
Sipas tij 13 dhe 14 korriku do të jenë data kur do të votojnë personat në vetizolim, të sëmurët me Covid-19 dhe qytetarët që kanë sëmundje të tjera
“Ne jemi të vetëdijshëm që jemi në një moment të ndërlikuar, duhet të ndërmarrim hapa të rëndësishëm. LSDM është mbajtësi i pushtetit përgjegjës, ne duhet të bëjmë gjithçka për t’i siguruar institucioneve me kapacitet të plotë. Ne kemi nevojë për Kuvend aktiv dhe një qeveri politike funksionuese. Kjo lojë nervash në të cilën vuajnë qytetarët duhet të përfundojë. LSDM-ja po tregon edhe një herë madhështinë e saj, në mënyrë që njerëzit të mos vuajnë, e cakton 15 korrikun, si datën përfundimtare dhe të vetme për zgjedhjet.
Unë bisedova me Mickoskin dhe ai konfirmoi që ai do të kandidojë në zgjedhjet e 15 korrikut. E mërkura do të jetë ditë jo pune për të gjithë qytetarët. Kjo është për të shpëtuar shtetin. Të hënën dhe të martën do të votojnë personat e sëmurë, si dhe ata që janë pozitivë për me koronavirus, ata që janë në izolim dhe të sëmurë kronikë”, tha ndër të tjera Zaev.
Është disi e çuditshme që procesi zgjedhor të mbahet ditë të mërkure, por kjo ka ndodhur edhe më herët në shtetin fqinj. Zgjedhjet presidenciale të vitit 2004 u mbajtën më 28 prill (e mërkurë), dhe asokohe fitues rezultoi Branko Crvenkovski.
