Me shumë gjasa Partizani i sezonit të ri do të jetë ndryshe nga ai aktuali, pasi shumë futbollistë përflitet se do të largohen nga klubi kampion i Superligës.
Bie në sy largimi i kapitenit Alban Hoxha, që sipas lajmeve të fundit pas shtatë vitesh do të “divorcohet” me Partizanin. Esat Mala është një tjetër element i skuadrës triumfuese që ka vendosur të largohet nga “demat”, madje me parametra zero.
“Gijotina” te kampionët nuk ka fund, pasi të tjerë të mbijetuar janë në dyshim ose e kanë prerë biletën e largimit. Pas kapitenit Hoxha, në dyshim duket edhe e ardhmja e “ushtar” Telushit, i cili është në përfundim të kontratës me të kuqtë. Vlonjati del lojtar i lirë në fund të muajit.
“Panorama Sport” ka mësuar nga burime pranë klubit se deri tani drejtuesit e Partizanit dhe lojtari nuk janë ulur për të diskutuar për rinovimin e kontratës. Pra, e ardhmja e Bruno Telushit te “demat” ndodhet në një situatë të ngrirë, për të mos thënë që klubi me këtë heshtje nuk e ka vendosur nëse do ta mbajë apo jo 29-vjeçarin, i cili edhe në këtë sezon ka shënuar disa gola me peshë.
