Kryeministri Edi Rama deklaroi sot se marrëveshja për zgjedhoren e arritur pas konsultimeve të zhvilluara në një seli diplomatike, është e fundit e arritur në këtë mënyrë.
Rama tha se çështjet që na takojnë ti zgjidhim vetë, nuk është mirë dhe nuk duhet të shkojmë në dyert e ambasadave.
“Më vjen keq për atë që ndodhi, por ajo marrëveshje është e fundit që ndodh dhe arrihet në këtë mënyrë. Është e pafalshme që përfaqësuesit politikë mblidhen në një seli diplomatike, me përkthyes për të gjetur marrëveshjen.
Çështjet që duhet ti zgjidhim ne, nuk kemi pse të shkojmë në dyert e ambasadave”, tha Rama, ndërsa shprehu keqardhjen, për mosmarrjen e përgjegjësive nga politika shqiptare.
Rama tha se takimet mund të zhvillohen pa ndërmjetësimin e ambasadorëve, mund të takohemi kudo, përfshi këtu edhe gjatë vizitave te Baba Mondi, Kryepiskopata Ortodokse, te Kisha Katolike, madje edhe te Protestantët.
“I gjithë ky qëllim e bën të duket akoma më problematikë që jemi ende të paaftë të komunikojmë shqip me njëri-tjetrin pa përkthye. Rasti i fundit është flagrant.
Jemi mbledhur në një ambasadë të gjithë përfaqësuesit e forcave politike, mbyllur atje me ditë dhe netë për të lënë gjërat siç janë për tu marrë vesh në fund se nuk duhet bërë atë që duhet të bënim, por do i lëmë gjëra siç janë. Kur sheh këtë fund, mund të mendosh po këtë nuk mund ta realizoni vetë. Pse duhej që të kërkonim ndihmë në një ambasadë mike.
Pse duhej që komunikim mes nesh të kalonte në disa gjuhë. Më vjen keq, por mendoj se kjo do jetë e fundit dhe miqtë tanë të paçmueshëm nuk duhet të ndjehen më në këtë pozitë ashtu sikundër edhe zgjedhësit tanë nuk kanë pse të shohin nga dyer e ambasadave, nuk është sekret që me presidentin kemi çështje të hapura por patjetër që mund të takoheshim te Presidenti, te kryetari i Kuvendit, te kryemyftiu i Tiranë, te Baba Mondi, mund të shkojmë edhe te protestantë, por nuk mundet më që të bëjmë dialog dhe marrëveshje nëpër ambasada. Kjo duhet të jetë e fundit”, tha Rama.
