Qeveria e Kosovës me në krye me Avdullah Hotin ka hequr masën e reciprocitetit të vënë ndaj Serbisë nga qeveria e Albin Kurtit.
Por, kundër këtij vendimi në mbledhje votuan përfaqësuesit e AAK-së.
Zëvendëskryeministri Besnik Tahiri, ministrja e Jashtme, Meliza Haradinaj, ministri i Arsimit, Ramë Likaj dhe ministri i Zhvillimit Ekonomik, Blerim Kuçi nuk e dhanë votën për heqjen e reciprocitetit.
Pas këtij vendimi ka reaguar Presidenti Hashim Thaçi dhe kreu i LDK, Isa Mustafa.
Thaçi shprehet se tashmvë presioni duhet ti bëhet Serbisë, ndërsa Mustafa e ka cilësuar një vendim të guximshëm.
“E mirëpres vendimin e sotëm të Qeverisë së Republikës së Kosovës për heqjen e të gjitha barrierave, që Serbia deri më sot i ka përdorur si pretekst për bllokimin e dialogut për normalizimin e marrëdhënieve ndërshtetërore ndërmjet shtetit të Kosovës dhe Serbisë. Tani presioni ndërkombëtar duhet të drejtohet nga Serbia me qëllim që pa humbur kohë të rifillojë dialogu, i cili duhet të përfundojë me njohje reciproke ndërmjet dy shteteve. HTH”, shkruan Thaçi.