Marrëveshja e arritur mbrëmjen e së premtes në Këshillin Politik lidhur me zgjedhoren ka lënë të pakënaqur deputetë të asaj që konsiderohet si “opozita e re” apo e “emëruar” parlamentare.
Ambasadorja e SHBA në Tiranë, Yuri Kim, ka pritur në takim drejtuesit e 3 grupeve parlamentare, që pretendojnë se përfaqësojnë 39 deputetë, pa votat e të cilëve s´mund të miratohet Kodi i ri Zgjedhor, për faktin se zyrtarisht PS nuk ka më shumë se 82 vota, përfshi këtu edhe disa deputetë aleatë.
Përfaqësuesit e opozitës parlamentare pas takimit me ambasadoren amerikane Yuri Kim kanë deklaruar kundërshtimin e tyre për marrëveshjen e arritur. Ata insistojnë për ndryshim të sistemit zgjedhor.
“Nuk votojmë në Parlament asnjë marrëveshje të pjesëtarëve të dosjes 184, Damian Gjiknuri. Kërkojmë listat e hapura, administratë zgjedhore jo politike, votë emigrantësh. Pa këto kushte që i kemi kërkuar prej 15 muajsh, nuk votojmë asnjë marrëveshje”, u shprehën ato, pas takimit me Yuri Kim.
