Mbrëmjen e djeshme, Këshilli Politik arriti marrëveshjen lidhur me reformën zgjedhore, duke nënshkruar një dokument me 12 pika, ndërsa pritet hartimi i akteve ligjore që do të mundësojnë implementimin e tij.
Konsensusi mes opozitës së bashkuar dhe Partisë Socialiste u arrit pas negociatave të ndërmjetësuara nga ambasadorët, ndërsa drafti final u përshëndet nga politika e brendshme dhe ndërkombëtarët.
Por si u arrit marrëveshja, çfarë lëshuan palët në diskutime?
Socialistët hoqën dorë nga depolitizimi i administratës zgjedhore, e cila do të vijojë të jetë sipas formulës së deritanishme, ku në 50 % të KZAZ-ve opozita do të ketë shumicën dhe në 50 % tjetër shumica do të kontrollohet nga socialistët.
Gjithashtu PS pranoi teknologjinë në zgjedhje, më konkretisht identifikimin biometrik të votuesve.
Komisioni Qendror i Zgjedhjeve t’i nënshtrohet procesit të reformimit, ndërkohë që do të krijohet posti i zv.kryetarit të KQZ-së, që do të kujdeset për procesin e zbatimit të projektit të identifikimit biometrik të votuesve.
Ndërkohë që pranë KQZ-së do të jetë dhe dy eksperte të huaj që do të ndihmojë në përgatitjen, trajnimin dhe zbatimin e procesit të identifikimit biometrik.
Palët kanë rënë dakort që sistemi zgjedhor të mos preket, ndërsa e vetmja që kërkon ndryshimin në Këshillin Politik, është Rudina Hajdari.
Opozita e bashkuar hoqi dorë nga kërkesa apo kushti i saj për Qeveri tranzitore, apo nga kushti se nuk hynte në zgjedhje nëse Edi Rama do të ishte Kryeministër. Gjithashtu opozita hoqi dorë nga propozimet për trajtimin e ankesave zgjedhore në Kushtetuese, apo që gjyqtarët që do të trajtonin këto ankesa, të mos kishin kaluar vetting.
Këshilli Politik do të vazhdojë të diskutojë me mirëbesim dhe të përpiqet të arrijë zgjidhje të pranueshme reciprokisht kur dhe ku është e mundur të adresojë rekomandimet kryesore të ODIHR në lidhje me: (1) blerjen e votave; (2) presion ndaj votuesve dhe administratës publike; (3) keqpërdorimi dhe abuzimi i burimeve të administratës, shtetërore dhe financiare; (4) përplasje me grupet kriminale; (5) liria e votës dhe fshehtësia; dhe (6) manipulimi dhe falsifikimi i rezultateve zgjedhore.