Cristiano Ronaldo është bërë futbollisti i parë në histori, që merr statusin e miliarderit.
Sipas Forbes, ylli i Juventusit, në moshën 35-vjeçare, bëhet sportisti i katërt që ka arritur momentin historik, duke u bashkuar me Michael Jordan, Tiger Woods dhe Floyd Mayweather Jr.
35-vjeçari, i cili më herët këtë vit u quajt nga “Forbes” si futbollisti më i paguar në planet për 2020-ën, ka qenë gjithashtu sportisi më i paguar gjatë karantinës. Edhe pse jo në aktivitet, ai është paguar 1.9 milionë paund vetëm për postimet në Instagram.
Me gati 420 milionë fansa në të gjitha rrjetet sociale, duke llogaritur edhe pagën vjetore e bonuset që merr nga Juventusi, Ronaldo është vërtetë një prej atletëve me fitimet më të mëdha. Ndërkohë nga sponsorizimet e firmave të ndryshme dhe nga fitimet e brand-it të tij duke përfshirë edhe rrogën nga Juventusi sipas Forbes gjatë vitit të fundit ai ka fituar 105 milionë dollarë.
Sipas “The Sun” ish-futbollisti i Real Madrid tani ka marrë statusin e miliarderit. Përpara “rivalit të tij të përjetshëm” Lionel Messi, i cili pritet po ashtu ta arrijë këtë status brenda së shpejti. Gjithsesi, pavarësisht këtyre numrave, më i paguari sportist i këtij viti ishte tenisti Roger Federer. Fitimet e tij llogariten deri në 106.3 milionë dollarë.