Dekretoi me urgjencë ligjin për Eurobondin, Meta shpjegon arsyet

Presidenti Ilir Meta i ktheu Kuvendit, një ditë më parë, ligjin për eurobondin. Sot maxhoranca, në seancë plenare, ka bërë amendament e nevojshme dhe ka miratuar me 85 vota pro në parlament marrjen e këtij eurobondi, konkretisht 650 milionë euro.

Pas amendamenteve, që pasqyrojnë propozimet e Metës, Presidenti nëpërmjet një dokumenti të shpërndarë nga Presidenca sqaron vendimin për dekretimin e menjëhershëm të ligjit për Eurobondin, i cili i lejon qeverisë marrjen e një borxhi prej 650 mln eurosh.

Sipas Presidentit, në shkresën zyrtare të Komisionit të Ekonomisë dhe Financave, shpjegohet nevoja dhe urgjenca të lidhura me dëmin e lartë financiar të shkaktuar pas tërmetit dhe pandemisë.

Po sipas kreut të shtetit, dekretimi i menjëhershëm, ka të bëjë edhe me vënien në dispozicion të qëndrimit dhe vlerësimit të Bankës së Shqipërisë dhe Avokaturës së Shtetit lidhur me këtë transaksion.

“Sa më sipër, pas vlerësimit të plotë të të gjithë praktikës dhe sqarimeve shtesë, Presidenti i Republikës jep pëlqimin e tij për hyrjen menjëherë në fuqi të ligjit, pas miratimit nga Kuvendi.

LEXO EDHE  Pipero: Kemi raste që virusi nuk prek vetëm mushkëritë por edhe trurin

Nga ana tjetër, kërkohet që, gjatë shqyrtimit të këtij akti në seancë plenare, si Kuvendi, edhe Qeveria të konsiderojnë shqetësimin e ngritur nga Presidenti i Republikës, por dhe nga Banka e Shqipërisë, për:

Analizën e kostos dhe përfitimit të marrjes hua në tregun e brendshëm (në lekë/në euro), apo në tregun e huaj, ose një kombinim i tyre.

Çdo transaksion financiar duhet të paraprihet nga një analizë e gjendjes së valutës aktuale, të pritshmërisë së huadhënies për situatën emergjente të dhënë nga institucionet ndërkombëtare (FMN, BE etj.), si dhe të nevojave prioritare për të përcaktuar shumën e duhur në kohë të huamarrjes në tregun ndërkombëtar.

Në përfundim, ritheksohet nevoja që Qeveria dhe Kuvendi, në nisma të tilla ligjvënëse, të veprojnë në kohën e duhur, në mënyrë që t`u lihet hapësira e nevojshme të gjitha strukturave apo institucioneve për shqyrtimin e tyre”, sqaron Presidenti.