Kryetari i PAA-së, Agron Duka, ka komentuar situtatën politike në vend dhe negociatat për Reformën Zgjedhore.
Në një intervistë për Syri Tv, Duka tha se Basha bëri gabim me marrëveshjen e 2017-ës, ndërsa shtoi se propozimi i opozitës për qeveri kujdestare para zgjedhjeve nuk është e njëjta gjë.
“Do të ishte shumë mirë pasi ne e kemi humbur besimin se me Ramën kryeministër mund të ketë zgjedhje të lira e të ndershme e për këtë kemi ato dosjet e famshme. Është shumë mirë kur qeveria është e paanshme. Basha gaboi me marrëveshjen e 2017-ës, e kemi thënë. Por nuk po kërkojmë të njëjtën gjë pasi larg qoftë do të kemi të njëjtin rezultat”, tha Duka.
Sa i përket ftesës së kryeministrit Edi Rama për një takim me kreun e opozitës Lulzim Basha, kreu i PAA tha se “Rama është hilacak”.
“Ne kemi një vullnet shumë të mirë që reforma zgjedhore të miratohet. Jemi të interesuar realisht në mënyrë që vendi të ketë zgjedhje të lira e të ndershme”, shtoi ai
Por cilat janë pritshmëritë e Agrearëve në zgjedhjet e ardhshme?
“Kemi bërë sondazhet tona dhe pretendojmë të kemi 5 deputetë. Që nga momenti që kemi marrë këtë parti, opozita nuk ka marrë pjesë në zgjedhje dhe kjo do të jetë hera e parë që do të marrim pjesë në zgjedhje”, u shpreh Agron Duka.
