Borxh për të larë borxhin, Eurobondi 650 milionë euro diskutohet te Ekonomia

Komisioni i Ekonomisë diskutoi sot për eurobondin, një projektligj i hartuar nga Ministria e Financave, që konsiston në marrjen e huasë në vlerën e 650 milionë euro, në një afat midis 7 deri në 10 vjet.

Ministrja e Ekonomisë dhe Financave, Anila Denaj, tha se financimi i siguruar nga eurobondi do të shërbejë, fillimisht për të shlyer apo rifinancuar eurobondin e marrë në vitin 2015, në vlerën e 250 milionë eurove, dhe pjesa e mbetur do të shkojë për të plotësuar nevojën për financim të vitit 2020.

Denaj solli si shembull pozitiv rastin e Maqedonisë së Veriut.

“Maqedonia e Veriut mundësoi emetimin e një eurobondit të shtatë në vlerën e 700 milionë euro me afat maturimi 6-vjeçar dhe me normë interesi prej 3.6% që është interesi i dytë më i ulët pas 2018-s”, tha ajo.

Deputeti Ervin Bushati tha se duhet parë mundësia e një eurobondeve në shifra më të mëdha.

LEXO EDHE  Drejtori i bankës në Elbasan pozitiv me COVID-19

“Thuhet në relacion që shlyerja mund të shkojë 7-10 vite. Mendoj që ka ardhur koha që Shqipëria të mendojë drejt zgjatjes së kohës, 10 vite patjetër por të shohim edhe në afat më të gjatë që ne të kemi mundësi të jemi kredibël në tregjet ndërkombëtare, por edhe të kemi mundësi manovrimi. Mendoj se Shqipëria ka mundësinë jo vetëm të kalojë nga 500 te 650 milionë, por të shikojë edhe mundësinë të kërkojë edhe shifra më të larta”, tha ai.

Denaj tha se për shkak të pandemisë, pritet rritje e mëtejshme e borxhit publik.

“Borxhi publik do të rritet. Në një parashikim të rritur nga 66.3% përpara përhapjes së pandemisë, në 68.8% tani”, tha ai. /TVT/