Tre ambasadorët në zyrën e Bashës, takimi “hermetik” 1 orësh për zgjedhoren/ FOTO

Tre ambasadorë, Yuri Kim (SHBA), Luigi Soreca (BE) dhe Duncan Norman (Britania e Madhe) kanë bashkëbiseduar për rreth 1 orë me kreun demokrat, Lulzim Basha, në selinë e PD-së, lidhur me reformën zgjedhore.

Asnjë prej diplomatëve nuk ka preferuar të japë detaje mbi takimin, sikundër edhe nga selia e PD nuk ka pasur asnjë reagim.

Burime diplomatike bëjnë me dije se takimin është në vijim të bisedimeve lidhur me reformën zgjedhore, për përafrimin e qëndrimeve mes socialistëve të drejtuar nga Edi Rama dhe opozitës e cila drejtohet nga Lulzim Basha.

Mësohet se tre diplomatët kanë kërkuar vijimin e dialogut mes palëve për arritjen e një konsensusi, duke sugjeruar heqjen dorë nga kushtet e parealizueshme, apo nga qëndrimet refuzuese.

LEXO EDHE  E rëndë/ Shqiptari humb jetën në një aksident tragjik, njësoj si i biri pak vite më parë! Emri (Foto)

Sikundër mësohet ambasadorët duket se kanë marrë rolin e ndërmjetësve mes drejtuesve te opozitës dhe PS-së, ndërsa ekipeve teknike, përfshi këtu edhe 4 anëtarëve të Këshillit Politik, u është kërkuar të vijojnë punën me synim përafrimin e qëndrimeve.

Paralelisht nga burime jo zyrtare mësohet se nuk është përjashtuar mundësia që në vjeshtën e këtij viti, të testohen ndryshimet në Kodin Zgjedhor me zgjedhjet vendore, që duket se është një propozim i hedhur në tryezën politike nga ambasadorët, pas problemeve që kanë shfaqur disa nga të zgjedhurit vendor, por edhe pjesëmarrja e ulët në votimet e 30 qershorit.