Ambasada amerikane në Tiranë reagoi sot përmes një deklarate, ku shpreh vendosmërinë e saj lidhur me reformën në drejtësi.
“Shtetet e Bashkuara mbeten vendosmërisht të përkushtuara ndaj reformës në drejtësi, e cila është kërkesë e popullit shqiptar. Në përgjigje të kësaj kërkese, në vitin 2016, Parlamenti miratoi unanimisht ligjet themelore për reformën. Prej atëherë, janë ngritur institucione kyçe dhe zbatimi vazhdon për t’i bërë ato funksionale. Reforma është e dhimbshme, e ngadaltë dhe e papërsosur por është e nevojshme. Reforma në drejtësi po ecën përpara dhe duhet të vazhdojë, në mënyrë që Shqipëria të bëhet anëtare e plotë e familjes europiane”, thuhet ndër të tjera në deklaratë.
Por, pas publikimit të saj në rrjetet sociale, janë me dhjetra komente të qytetarëve, që shprehin mosbesim lidhur me reformën, por jo vetëm, akuzojnë se ajo është e kapur nga Edi Rama.
Në komentet e qytetarëve, Ambasadës së SHBA i kërkohet të japë shpjegime lidhur me akuzat e Presidentit Ilir Meta, por edhe i kujtohen “peshqit e mëdhenj”.
Gjithashtu i kujtohet se reforma e nisur në 2016 nuk po jep asnjë rezultat, veçanërisht në goditjen e korrupsionit në nivele të larta.
