Ish-ministri i Drejtësisë, Ylli Manjani, ka reaguar ndaj qëndrimit të Ambasadës së SHBA lidhur me zbatimin e reformës në drejtësi.
Manjani sjellë në vëmendje faktin që anëtarë të rëndësishëm të Vettingut janë kapur në falsifikime dokumentesh dhe shkelje të rënda ligjore.
“Absolutisht, “Reforma në Drejtësi duhet të ecë përpara”. Veçanërisht me ata të vetting që kanë fallsifikuar të shkuarën e tyre…”,- shkruan Ylli Manjani në rrjetet sociale.
Pak më parë, Ambasada e SHBA në Tiranë përmes një postimi në rrjetet sociale, shkruante se Shtetet e Bashkuara mbeten vendosmërisht të përkushtuara ndaj reformës në drejtësi, e cila është kërkesë e popullit shqiptar.
“Në përgjigje të kësaj kërkese, në vitin 2016, Parlamenti miratoi unanimisht ligjet themelore për reformën. Prej atëherë, janë ngritur institucione kyçe dhe zbatimi vazhdon për t’i bërë ato funksionale.
Reforma është e dhimbshme, e ngadaltë dhe e papërsosur por është e nevojshme. Reforma në drejtësi po ecën përpara dhe duhet të vazhdojë, në mënyrë që Shqipëria të bëhet anëtare e plotë e familjes europiane”, thuhet në deklaratën e SHBA.
