Gjykata e Posaçme pezullon gjyqtarin Luan Daci/ Avokatët: Do e apelojmë, masa disiplinore është shuar

Gjyqtarja e Gjykatës së Posaçme, Daniela Shirka, vendosi sot të lërë në fuqi masën e pezullimit nga detyra të gjyqtarit Luan Daci.

Mësohet se gjatë seancës gjyqësore pala mbrojtëse është shprehur se gjyqtari Daci nuk mund të shkarkohet ose pezullohet pasi ai ka statusin e anëtarit të Gjykatës Kushtetuese.

Avokati Jordan Daci, i cili mbron gjyqtarin Luan Daci, tha sot se vepra penale për të cilën SPAK ka vepruar nuk ekziston.

“Klienti nuk ka gënjyer në formularët e deklarimit. Masa disiplinore ndaj Luan Dacit është shuar që në vitin 2008”, tha avokati Daci.

Sipas avokatëve, Luan Daci ka kaluar 5 filtra deri në marrjen e detyrës si anëtar i KPA.

“Keqkuptimet e krijuara do të sheshohen. Ne do të ndjekim të gjitha rrugët e ankimimit”, thanë mbrojtësit e Luan Dacit.

Luan Daçi, i shoqëruar nga avokatët Jordan Daci dhe Andi Duraj ka mbërritur në Gjykatën e Posaçme. Daci, i cili akuzohet për falsifikimi dokumentesh, sot do të njihet me masën e sigurisë për pezullim nga detyra.

LEXO EDHE  Dëshmitarët e Jehovait: Ne e çmojmë jetën, nënë e bijë nuk ishin pjesë e jona

Kjo masë sigurie i është vendosur disa ditë më parë dhe sot ai duhet të jetë i pranishëm ku do ti bëhet dhe komunikimi i kësaj mase dhe më pas ai ka të drejtë që të argumentojë në lidhje me vendimin që e ka marrë Gjykata dhe mbi provat që rëndojnë nga prokuroria e Posaçme.

Luan Daci, gjyqtar në shkallën e fundit të Vetingut në Kolegjin e Posaçëm të Apelimit u pezullua dhe është marrë në hetim nga Struktura e Posaçme e Antikorrupsion pasi ka fshehur të kaluarën e tij duke gënjyer për një shkarkim nga detyra si i paaftë në vitin 1997.