Selia e Partisë Socialiste përfshihet te monumentet e kulturës së Tiranës, ashtu sikundër përfshiheshin edhe disa objekte që kanë shërbyer si zyra për PSD dhe PR.
Çuditërisht në listën e monumenteve të kulturës nuk është përfshirë Teatri Kombëtar, i rrafshuar sot nga Kryebashkiaku Erion Veliaj dhe Kryeministri Edi Rama, akt ky që cilësohet si krim shtetëror.
Në emision Opinion, Gjergj Bojaxhi, tha se godina e PS ka ndryshuar fasadën 13 herë dhe s´mund të trajtohet si monument kulture.
I pranishëm në emision ishte edhe nënkryetari i Bashkisë, Arbian Mazniku deklaroi se godina e Teatrit Kombëtar nuk ka qenë kurrë monument kulture.
Ai u shpreh se Bashkia nuk është insitucioni përgjegjës për shpalljen e objekteve monument kulture dhe shtoi se ky objekt prej vitit 1958 ishte raportuar se kishte probleme dhe në 2004 thuhej se ishte pa vlerë.
“Mënyra se si hiqen dhe vihen është debat që mund ta bëni me organet respektive. Ne nuk merremi me këtë punë si institucion. Teatri nuk ka qenë kurrë monument kulture. Ansambli muzeal ka objekte specifike, teatri nuk ka qenë kurrë. Lista e 2004 thotë objekt pa vlerë. Procedura për bërjen është që fillimisht vendosen disa objekte në ruajtje paraprake, vihet në vlerësim nga ekspertët e fushës dhe ata dalin me raport ky të ruhet ky jo, është një objket që në 58 ka patur probleme me strukturën”, tha ai.
Mazniku shtoi se ky objekt ka qenë brenda linjës muzeale e cila ishte monument kulture por objektet sipas tij duhen trajtuar individualisht.
“Ka qenë brenda linjës muzeale, edhe kullat binjake kanë qenë aty. Thelbi është që fakti që janë brenda një zone nuk e ndryshon thelbin, duhen vlerësuar rast pas rasti. Objekti ishte me dërrasë dhe kashtë. Tallashi dhe druri i kalbur me cati teneqe nuk ruhet dot. Bërja e një objekti nga fillimi është qesharake”, shtoi Mazniku.
