Në pritje të zhvillimeve sa i përket protokollit të ri sanitar që federata italiane e futbollit ka dërguar në qeveri, ministri i Sportit, Vincenzo Spadafora, ka folur edhe njëherë për të ardhmen e Serie A.
Spadafora uron që kampionati të rinisë sa më shpejt, por asgjë nuk do të bëhet në nxitim e sipër dhe vendimet do të merren duke vëzhguar situatën me kujdes ditë pas dite.
“Shpresojmë të gjithë që kampionati të rinisë sa më shpejt të jetë e mundur, po për momentin nuk kemi siguri, ashtu si edhe ka kujtuar mjaft mirë kryeministri Conte. Nëse, ashtu si shpresojmë, kurba e infektimeve do të vazhdojë të zbresë, atëherë do të jetë e mundur që të konfirmojmë atë ditë për rifillimin e Serie A”.
“Por, duhet të arrijmë gradualisht, duke lëvizur me kujdes dhe përgjegjësi, ashtu si kemi bërë deri tani, me sakrificën e të gjithë italianëve”.
“Nëse një futbollist do të rezultonte pozitiv me coronavirus, ai do të kompromentonte veten dhe shëndetin e të tjerëve që e rrethojnë. Dhe, nëse ndodh kjo atëherë mund të vijë mbyllja përfundimtare e kampionatit. Ne nuk duam vetëm ta rinisim, por edhe t’i japim fund”. – ka thënë Spadafora.
