Ambasada amerikane në Tiranë hesht për shembjen e Teatrit Kombëtar në Tiranë me vendim të Bashkisë së drejtuar nga Erion Veliaj dhe bekimin e kryeministrit Edi Rama. Pavarësisht se nga opinioni publik dhe politika e brendshme, ambasadës i është kërkuar në mënyrë të përsëritur një reagim për çështjen, deri më tani, selia diplomatike ka zgjedhur të mos prononcohet, një qëndrim ky që duket se shkon në mbështetje të qeverisë.
Këtë të Martë, pati një takim me ambasadores amerikane në Tiranë Yuri Kim dhe kreut të qeverisë Edi Rama. Pas takimit, ambasada doli me një njoftim:
“Ambasadorja e SHBA Yuri Kim u takua sot me Kryeministrin Rama për të diskutuar mbi ngjarjet e fundit. Ambasadorja theksoi rëndësinë që ka gjithëpërfshirja dhe diskutimet e mirëmenduara në qeverisje, në përputhje me statusin e Shqipërisë si anëtare e NATO-s dhe vend që synon anëtarësimin në BE. Ata u pajtuan se është thelbësore që Shqipëria të vijojë në rrugën e saj drejt arritjes së dakortësisë për reformën zgjedhore dhe masave të tjera që u janë premtuar qytetarëve të Shqipërisë. Ambasadorja Kim do të takohet edhe me kreun e PD-së Basha së shpejti”.
Heshtja në favor të qeverisë
Asnjë fjalë për teatrin, një çështje tepër e ndjeshme ditët e fundit, shembja e të cilit është konsideruar një krim. Kreu i shtetit Ilir Meta kërkoi hetim ndërkombëtar. Opozita, artistët që protestojnë dhe zëra të spikatur të opinionit publik janë shprehur se shembja e teatrit ishte një akt diktatorial, një veprim kriminal që duhet të ndëshkohet nga drejtësia. Kërkuan shkarkimin e Ramës dhe Veliajt. Zëra me peshë në arenën ndërkombëtare në fushën e kulturës e politikës kanë dënuar po ashtu shembjen e Teatrit Kombëtar.
Në reagimin e ambasadës, nuk kishte as edhe një fjalë as për dhunën policore, që zuri hapësirat e mediave ndërkombëtare, të cilat kanë raportuar për stilin autokratik në rritje të kryeministrit Edi Rama. Presidenti i Partisë Popullore, Donald Tusk dënoi si dhunën policore ashtu dhe shembjen e teatrit. Ambasada amerikane, ndërkohë, zgjodhi të heshtë.
Mesazhi i ambasadës të krijon përshtypjen që ambasadorja Kim e inkurajoi kryeministrin në shembjen e teatrit dhe dhunën policore.
Zëri qytetar
Qëndrimi i ambasadës kritikohet dhe nga komentuesit në FB, ku selia diplomatike ka shpërndarë njoftimin pas takimit Kim-Rama.
“Cili është qëndrimi juaj për Teatrin?! Arroganca juaj për të mos u përgjigjur popullit është bashkëfajësi, është një tradhti ndaj besimit të shqiptarëve tek SHBA”, shkruan një komentues.
“Nuk mund të takonte ata që u rrahë e u morën zvarrë”, shprehet një tjetër.
“Këto përralla ikni dhe bëjeni andej nga thirret Bota e Tretë, por jo në qendër të Evropes”, komenton një qytetar.
“Si e uroi: Te lumshin duart e vogla”, shkruan një tjetër.
