Teatri, Veliaj jep detajet nga projekti i ri: Do ketë edhe katering

Një ditë pasi rrafshoi Teatrin Kombëtar, Erjon Veliaj, nuk ka humbur kohë, por ka nxituar të shpalosv detaje mbi godinën e re që do të ndërtohet, e cila sipas tij do të jetë 6 herë më e madhe se Teatri që kishim.

I projektuar sipas konceptit të Bjarke Engels, godina e re, sipas Kryebashkiakut, do të ketë për herë të parë jo një, por disa skena ku artistët do të vënë shfaqjet e tyre para publikut.

“Patëm një votim unanim me 60 vota për ecjen përpara të qytetit tonë. Njerëzit janë zgjedhur për të marrë vendime të vështira. Nëse do të kishin qenë të lehta do i kishin marrë të tjerët para nesh. Nuk është e lehtë të zgjohesh në mëngjes me mallkime, deri per djalin. Ishte një vendim i vështirë, por i drejtë. Në terma të përgjithshëm bëhet fjalë për një teatër 8930 m2, pra janë trefish krahasuar me ekzistuesin dhe gjashtëfish nga ajo që ishte në hipotekë”, theksoi Veliaj.

Duke dhënë detaje, ai shtoi se auditori kryesor do të ketë 650 vende në një hapësirë gjigande prej 750 m2, ndërkhë që vetëm skena gjigande do të jetë 630 m 2 e përshtatshme për të gjithë veprat artistike.

“Në vend të kutive prej kartoni apo dollapëve plot myk, në dispozicion të aktorëve si ambiente ndihmëse do të jenë 520 m 2, ndërkohë që 1800 m 2 do të shërbejnë si ambiente ndihmëse për skenën”, tha Veliaj.

LEXO EDHE  Rakipi: Ja pse Rama sulmon Metën, e kërcënon PS në 7 zona zgjedhore

Godina e projektit të Teatrit të Ri ofron edhe dy salla Balc Box me 150 vende dhe 350 vende duke i dhënë shansin grupeve të ndryshme artistike, mes tyre edhe të rinjve, që të ngjisin në skenë veprat e tyre.

Teatri do të ketë edhe një auditor të hapur në tarracë për në pranverë dhe verë me 380 vende, duke krijuar një hapësirë unike në qytetin e Tiranës, me të gjitha kushtet e nevojshme për realizimin e shfaqjeve teatrore.

Godina e re do të ketë edhe depo për ruajtjen Brenda të gjithë standardeve të materialeve të Teatrit, zyra administrative, hapësira teknike etj.

Teatri do të ketë të inkorporuar edhe një hapësirë publike, ku do të jetë recepsioni për të dhënë informacione për artdashësit, ambiente të tjera ndihmëse., si dhe katering që mund të shfrytëzohet nga aktorët gjatë provave apo publiku para apo pas shfaqjeve që do të jepen.

Detajet për Teatrin e ri Kombëtar Veliaj i prezanton në një kohë kur vijojnë protestat në Tiranë lidhur me shembjen e godinës, e cila ishte marrë në mbrojtje nga aktorë dhe artistë, madje edhe nga Europa Nostra.