Garancia sovrane/ Ahmetaj: Janë miratuar 1.2 mld lekë kredi, janë kërkuar 4.3 mld lekë

Ministri i Rindërtimit, Arben Ahmetaj, tha mbrëmjen e sotme në “Opinion” se paketat e ndihmës janë 5.41 % e GDP-së.
Ahmetaj tha se me situatën e koronavirusin nuk munguan as respiratorët dhe as shtretërit në spitale, nuk munguan as ushqimet, dhe as ndihmat për qytetarët.

Në debat me ministrin Ahmetaj, eksperti i ekonomisë Artan Hoxha tha se procedurat që ndeshen qytetarët janë shumë burokratike, ndërsa theksoi se qytetarët i kanë lënë të painformuar se kush përfiton dhe kush jo.

“Keni krijuar konfuzion te qytetarët, nuk i sqaroni se pse përfitojnë nga paketa e parë dhe jo e dytë, dhe diferenca është e madhe”, tha Hoxha.

Lidhur me garancinë sovrane të vendosur nga Qeveria për kredi, Ahmetaj tha se janë rreth 4.3 mld lekë për të cilat është aplikuar, nga 11 mld lekë që janë vendosur si garanci.

LEXO EDHE  Koronavirusi rriti rastet e dhunës në familje

“Janë miratuar 1.2 mld lekë, pjesa tjetër është në proces. Mendoj se deri në përfundim të 3 mujorit 100 mln eurot e vendosura do të tërhiqen”, tha Ahmetaj.

I pyetur nëse Qeveria ka ndonjë skenar se një pjesë e kësaj kredie mund të mos kthehet, Ahmetaj tha se mendon se do të jetë nivel maksimumi deri në 5 %, që mendoj se do të jetë për shkak të ndonjë falimentimi.

Ahmetaj foli për një paketë të tretë, e cila sipas tij, do të jetë për rimëkëmbjen ekonomike. “Në jug të Shqipërisë nuk mund të prenotosh sot, sepse është plot me prenotime”, tha Ahmetaj, duke u shprehur se turizmi mund të pësojë goditje, por jo aq të madhe.