Nga Boldnews.al
Këshilli i Lartë Gjyqësor, pas dy mbledhjeve dhe një komunikimi të ethshëm shkresor, nuk arriti të zgjidhë një problem të thjeshtë matematikor mbi mandatin e kryetarit në detyrë të Gjykatës së Lartë, Ardian Dvorani.
KLGJ ka vendosur në mbledhjen e kësaj të Marte të pyesë konsorciumin privat, EURALIUS, nëse 9 (vite mandat) të Dvoranit plus 6 (vite në detyrë edhe pas mandatit) bëjnë sërish 9?
Pra, Këshilli i Lartë Gjyqësor, megjithëse e ka shumë të thjeshtë të kryejë llogaritë dhe të marrë vendim, ka zgjedhur t’i drejtohet misionit të finacuar nga Bashkimi Europian për të zgjidhur problemin e klasës së parë fillore.
Por, a janë aq të paaftë “ajka” e juristëve, të cilët janë emëruar në Këshillin e Lartë Gjyqësor apo ata po fshehin frikën e tyre ndaj qeverisë, nëpërmjet “rrobave” të ndërkombëtarëve?
Duket qartë që trupa e KLGJ-së ka gjetur një rrugë të mesme, për të mos i dhënë të drejtë Presidentit të Republikës, i cili kërkon largimin e Dvoranit, por edhe për ta mbajtur mirë me qeverinë, e cila e ka mbështetur dhe vijon ta mbështesë fuqishëm kryetarin në detyrë të Gjykatës së Lartë.
Dhe, nën këtë dilemë, Këshilli i Lartë Gjyqësor krijoi një situatë groteske, por duke ngritur edhe pikëpyetje të forta mbi integritetin e kësaj trupe, e cila ka në dorë karrierën e gjyqtarëve të republikës.
Ardian Dvorani është emëruar si anëtar i Gjykatës së Lartë në vitin 2005, për një mandat 9-vjeçar. Atij i ka përfunduar mandati kushtetues në vitin 2014, por, për shkak të disa “levave” politike, ai vijon të qëndrojë në detyrë.
Ardian Dvorani mban edhe detyrën e kryetarit të Këshillit të Emërimeve në Drejtësi. Nga ky pozicion, ai është përfshirë në një kurs përplasjesh institucionale me Presidentin Ilir Meta.
Kreu i Shtetit, Meta, kërkoi nga Këshilli i Lartë Gjyqësor që të vendoste mbi përfundimin e mandatit të Ardian Dvoranit, për shkak të tejkalimit të afatit të qëndrimit në detyrë.
Këshilli i Lartë Gjyqësor, i cili kishte në dorë vetëm t’i jepte përgjigje ekuacionit të thjeshtë sa bëjnë 9+6, vendosi ta ndërlikojë së tepërmi situatën.
Mbledhja plenare e KLGJ-së vendosi që të marrë opinionin e juristëve të EURALIUS-it, para se të marrë një vendim për karrierën e Dvoranit në sistemin e drejtësisë.
Tashmë, ekspertët e konsorciumit privat që përbën EURALIUS, pritet të ulen për të diskutuar të gjithë variantet e përgjigjes nëse 9+6 bëjnë 15, pra që Dvorani duhet të largohet apo 9+6 bëjnë sërish 9, duke mbajtur edhe për ca kohë në detyrë kreun e përkohshëm të Gjykatës së Lartë.
Nuk do të jetë aspak surprizë nëse EURALIUS do të vendosë që 9+6 bëjnë sërish 9. Ekspertët e këtij konsorciumi kanë dhënë prova që 84 është barazim me 69, kur Parlamenti zgjodhi në mënyrë antikushtetuese Prokurorin e Përgjithshëm të Përkohshëm, në Dhjetor 2017.
