Maska me 50 cent dhe teste në masë serologjike për qytetarët. Këto janë masat që do të shoqërojnë fazën e dytë të hapjes në Itali, e cila nis më 4 maj.
Në rajone janë shpërndarë mbi 165 milion maska, ndërsa brenda 10 ditëve nis prodhimi i maskave, ku parashikohet që në mes të qershorit, të prodhohen 4 milion maska në ditë dhe në mesin e korrikut 25 milion të tilla.
Ndërkohë në Itali janë siguruar 5 mln teste serologjike, që i shtohen 3.5 milionë testeve që ishin.
Komisioneri i urgjencës në Itali, Domenico Arcuri e konsideroi procesin e hapjes si të vështirë, ndërsa shtoi se qytetarëve do iu kërkohet një “përgjegjësi shtesë”.
Ai njoftoi se në 50 mijë pika shitje, italianët do të mund të gjejnë maska me çmimin 50 cent, ndërsa po nga e hëna do të fillojnë edhe 150,000 teste serologjike.
“Faza 2 fillon të hënën. Duhet të jemi të vetëdijshëm se fillon një sfidë edhe më e vështirë. Liria relative që secili prej nesh po fiton duhet të përdoret në funksion të shëndetit të të gjithë neve. Do të duhet të imagjinojmë një shkëmbim të arsyeshëm midis lirisë relative dhe shëndetit. Deri më tani kemi bërë të gjithë shumë sakrifica, dhe duhet të jemi mirënjohës për të gjithë italianët. Nga e hëna u kërkojmë atyre një përgjegjësisë shtesë. Fillon gjysma e dytë e një loje që nuk e dimë se sa do të zgjasë dhe si do të përfundojë“, tha Domenico Arcuri.
