Kryetari i PD-së, Lulzim Basha, tha se nëse Qeveria do të kishte një plan dhe do të ishte transparente, atëherë Shqipëria do të ishte më e hapur.
I ftuar në emisionin “Opinion”, Basha tha se tashmë pandeminë e Covid-19 po e konkuron kriza ekonomike, e cila është edhe më e rrezikshme.
“Shqiptarëve poi u shitet sapuni për djathtë, përsa kohë jemi vendi me numrin më të vogël të testimeve. Qeveria ka mbajtur të ulët numrin e testimeve, duke fshehur realitetin”, tha Basha.
Sipas tij, kurba e Covid-19 është e ngjashme me fjalimet e Kryeministrit, nuk ngjason me asnjë kurbë të asnjë vendi tjetër.
Basha tha se masat që ka marrë Qeveria janë pa plan, vendosen me një rregjim rrjetesh sociale.
“Pandemia nxorri në pah shtetin e kartonit, nxorri në pah se këtu s´ka shtet. Greqia ka një numër më të vogël vdekjesh për 1mln banorë se Shqipëria. Qeveria ishte dhe është pa plan si në aspektin shëndetësor dhe ekonomik”, tha Basha.
