Nga BoldNews.al
Ministri i Rindërtimit dhe Pandemisë, Arben Ahmetaj, ndoshta më i rëndësishmi për përballimin e krizës ekonomike të shumëfishuar nga korona-virusi, prej shumë ditësh ka kaluar në hije.
Ai ka humbur primatin mediatik pas prezantimit butaforik me valixhe me letra dhe shprehjen “carta canta” (letrat këndojnë) që bëri në studion e “Opinion” fillim-javën e kaluar.
Emisionet televizive në prime-time e kanë zëvendësuar Ahmetajn me Ministren e Financave, Anila Denaj.
Kjo rrokadë ministrash, nuk duket se është thjeshtë zgjedhje e televizioneve. Ministrat dalin në media vetëm me komandën e zyrës së propagandës së Edi Ramës. Dhe, kryeministri duket se ka vendosur të shtypë butonin “mute” (shqip; Pa zë) tek emri i Arben Ahmetajt.
“Ministri i Virusit” u shfaq javën e kaluar në “Opinion” me një valixhe, për të cilën tha se “letrat këndojnë”, duke treguar se brenda saj gjendeshin zgjidhjet për krizën ekonomike të shqiptarëve.
Por, pasi i hapi dhe nisi t’i lexonte, ai foli për një fond “fantazëm” 650 milionë euro, të cilat, sipas tij, do të alokoheshin për përballimin e krizës së shqiptarëve.
Media, përfshirë edhe “Boldnews.al”, kreu disa analiza të thjeshta, në bazë të të cilave u kuptua qartë se Arben Ahmetaj po bllofonte.
Duke qenë se “ministri i Virusit” nuk e luajti mirë rolin mediatik, zyra propagandistike e Edi Ramës zgjodhi një taktikë të butë-kalimin e Ahmetajt në heshtje dhe zëvendësimin e tij mediatik me Anila Denajn.
Ministrja e Financave nuk duket se transmetoi ndonjë siguri të lartë për të ardhmen ekonomike të qytetarëve, në intervistën e së martës në mbrëmje.
Ajo deklaroi se qeveria nuk i ka të qarta idetë se si mund të vijë rimëkëmbja ekonomike. Denaj u shpreh disa herë se, deri në Qershor, do të mund të hartojnë një plan afat-mesëm.
Ministrja e Financave pranoi problemet në sistemin e rimbursimit të “pagës së luftës”, në përgjigje të pyetjeve dhe shqetësimeve që mbërritën në studion televizive gjatë kohës që ajo po fliste për planet qeveritare.
Denaj deklaroi se koncensionet në Shëndetësi ishin pezulluar, gjë normale në një kohë kur qytetarët e izoluar nuk po marrin shërbimet e koncensionarëve. Por, Ministrja e Financave nuk dha përgjigje nëse ishte menduar apo planifikuar pezullimin e një numri të konsiderueshëm koncensionesh të tjera.
Anila Denaj nuk kishte përgjigje të sakta për shumë pikëpyetje të qytetarëve. Megjithatë, ajo nuk u mburr se “letrat këndojnë”.
Ministrja e Financave tregoi atë që shumë qytetarë e kuptojnë fare mirë-qeveria ishte tërësisht e papërgatitur për një plan ekonomik krize dhe është tërësisht e paqartë për të ardhmen e afërt ekonomike.
Por, ndoshta ky ka qenë qëllimi i Edi Ramës për t’u dhënë shqiptarëve sinjale se jeta do të vështirësohet. Mesa duket, sondazhet e kryeministrit e kanë kuptuar se “këngët” e ministrit të Virusit nuk pëlqehen nga qytetarët.
Ndaj, me shumë mundësi, “ministri i Virusit”, Arben Ahmetaj, do të qëndrojë për pak kohë “mute” (pa zë).
