Ambasada e SHBA-së në Tiranë duket se ka propozuar një formulë për t´i dhënë zgjidhje gjykimit të dosjeve në Gjykatën e Lartë. Në këtë të fundit janë rreth 35 mijë dosje që presin gjykimin, ndërkohë që deri më tani Gjykata e Lartë ka 4 anëtarë, përfshi këtu edhe Ardian Dvoranin.
Përmes një njoftimi, Ambasada e SHBA bën me dije se USAUD ka firmosur një Memorandum Mirëkuptimi me KLGJ, për të ofruar ndihmën teknike të nevojshme.
Sipas kësaj marrëveshjeje, një ekip i veçantë avokatësh të zotë shqiptarë do të punësohen për të ndihmuar gjykatën që të veprojë me më shumë efikasitet dhe të mundësojë që gjykatësit të marrin vendime më shpejt.
Gjykata e Lartë është jashtë funksionit pasi anëtarët e saj, me përjashtim të Ardian Dvoranit, u skualifikuan nga procesi i Vetting. Prej të paktën dy vjetësh kjo Gjykatë u kthye thjesht në një “depo” të dosjeve që ishin gjykuar në shkallën e parë dhe atë të Apelit, ndërsa tashmë presin një shqyrtim nga Gjykata e Lartë.
Në një njoftim zyrtar, pak ditë më parë, Gjykata bënte me dije se ndikim të ndjeshëm në rritjen e numrit të çështjeve në pritje për t’u shqyrtuar ka pasur pakësimi gradual i numrit të gjyqtarëve dhe këshilltarëve ligjorë në detyrë gjatë 3 viteve të fundit, si edhe fakti që nga muaji Maj 2019, kjo gjykatë nuk ka qenë funksionale dhe nuk ka mundur të shqyrtojë dhe gjykojë më çështje gjyqësore.
Në mesin e muajit mars, pas emërimit të tre gjyqtarëve të rinj, janë krijuar kushtet ligjore minimale që Gjykata e Lartë të fillojë të ushtrojë një pjesë të të funksioneve të saj.
Pas fillimit të ushtrimit të detyrës së gjyqtarëve të rinj, kjo trupë ka përcaktuar një metodologji të punës, nëpërmjet përdorimit të mjeteve dhe mënyrave më efektive që garantojnë shqyrtimin dhe gjykimin në kohën më të shpejtë, të arsyeshme dhe me cilësi të një numri të madh të çështjeve gjyqësore.
Njoftimi nga Ambasada e SHBA
Gjykata e Lartë ka aktualisht pothuajse 35,000 dosje të prapambetura. Për të zgjidhur këtë problem, USAID dhe Këshilli i Lartë Gjyqësor Shqiptar nënshkruan një Memorandum Mirëkuptimi më 29 prill, për të ofruar ndihmën teknike të nevojshme.
Sipas kësaj marrëveshjeje, një ekip i veçantë avokatësh të zotë shqiptarë do të punësohen për të ndihmuar gjykatën që të veprojë me më shumë efikasitet dhe të mundësojë që gjykatësit të marrin vendime më shpejt.
Ashtu siç Shtetet e Bashkuara mbështetën fuqimisht miratimin e reformave gjyqësore, ashtu ne mbështesim fuqimisht zbatimin e plotë dhe në kohë të këtyre reformave.
Drejtësia e vonuar është drejtësi e mohuar. Ne presim të shohim numrin e prapambetur të këyre çështjeve që zvogëlohet sa më shpejt që të jetë e mundur.
