Mjeku i njohur Pëllumb Pipero është i ftuar në emisionin Open ku ka folur se si është situata në infektiv momentalisht.
Ai u shpreh se situata është normalizuar shumë dhe se rastet që paraqiten për tu shtruar janë ulur shumë.
“Situata në infektiv është e qetë aktualisht, kemi rreth 30 të sëmurë nga të cilët shtatë janë në terapi intensive por në gjendje të stabilizuar, megjithëse do thoja në gjendje relativisht kritike. Kujdesi i mjekëve është maksimal.
Ajo që është e rëndësishme ta theksoj është se nëse para disa javësh kishin 7-8 persona që shtroheshin në ditë në spital, tani kemi 2-3 që do të thotë se pandemia në vendin tonë është e butë”, tha Pipero.
Duke folur për hapjen graduale, Pipero tha se nuk ka vend për të dramatizuar situatën.
“Unë nuk shikoj se ka vend për të dramatizuar situatën. Tani normalitetit që kemi pasur nuk mund t’i rikthehemi deri në momentin që të kemi një vaksinë.
Por nuk ka vend për dramatizme. Unë besoj jam më radikal. Unë nuk jam pro këtyre maskave me ndarje xhami etj, por unë them që mjafton vetëm një maskë, kjo pasi virusi përhapet me anë të spërklave”, tha Pipero.
Mjeku i njohur mendon se situata është nën kontroll, sa i përket përhapjes së pandemisë së COVID-19 në vendin tonë. Ai tha se deri më tani ndihet krenar për reagimin e autoriteteve si edhe të shqiptarëve.
“Epidemia te ne është e qetë, është e butë aktualisht e gjithashtu në rënie progresive të qëndrueshme. Masat kane qenë adekuate, ashtu si edhe përkushtimi i bluzave të bardha. Por edhe përgjigja e qytetarëve ka qenë optimale.
Ne i jemi përgjigjur epidemisë në vendin tonë me masa adekuate dhe unë si mjek jam krenar për këtë. Hapja është proporcionale me ecurinë e epidemisë në vendin tonë. Do të thosha është pak e guximshme”, tha Pipero
