Ministrja e Shëndetësisë, Ogerta Manastirliu, tha se transporti publik nuk do të vihet në funksion në këtë fazë të parë dhe të dytë.
Manastirliu tha se duhet të sakrifikojmë edhe pak kohë, ndërsa ekspertët po hartojnë një strategji për të mbrojtur shendetin e popullatës.
Në emisionin Opinion, Manastirliu tha se faza e tretë e hapjes do të realizohet pas një vlerësimi të situatës në një afat kohor prej 10 ose 14 ditësh.
“Baret, restorantet dhe palestrat, trajtimet estetike, konsideron me risk të lartë, ndaj dhe nuk kemi një datë se kur mund të hapen.
Ne do të vlerësojmë impaktet se çfarë sjell hapja e bizneseve në përhapjen e virusit. Kjo është një fazë testimi që ne do të shikojmë se çfarë do të ndodhë në përhapjen e virusit”, tha Manastirliu.
Madje, ministrja e Shëndetësisë nuk ishte në gjendje të jepte një përgjigje nëse do të ketë sezon turistik në Shqipëri.
“Rreziku nuk ka kaluar, duhet të jemi të kujdesshëm me plazhet, me turizmit. Do të shikojmë hap pas hapi”, tha ajo.
Sipas saj, njerëzit në det duhet të respektojnë distancat e sigurisë, rreziku nuk ka kaluar.
“Duhet të kuptojmë se nuk po jetojmë në normalitet, jemi në gjendje të jashtëzakonshme”, tha ajo.
Ministrja e Shëndetësisë tha se nëse nuk do të ishin marrë masat, atëherë do të kishim një përmbytje në spitale.
“Jemi në mesin e luftës, dhe kush bën llogaritë tani, i bën gabim ato”, tha Manastirliu.
