Presidenti Ilir Meta duket se do të luajë rolin e një interlokutori mes Qeverisë dhe biznesit fason, i cili ka paraqitur 4 kërkesa në kushtet e krizës së krijuar nga koronavirusi.
Kreu i Shtetit ka zhvilluar një takim me kryetarin e Shoqatës së Fasonistëve të Bashkuar, Gjergji Gjika. Pas takimit me Presidentin, Gjika ka pohuar se Meta ka marrë përsipër të negociojë me Qeverinë lidhur me kërkesat e parashtruara.
“Nuk kemi pasur asnjë përgjigje nga autoritetet shqiptare që merren me këtë punë, ndaj u detyruam ti drejtohemi Presidentit për të kërkuar mbështetjen e tij në katër pika kryesore që fasoneria ka kërkuar një zgjidhje prej një muaji.
E para është paga minimale që duhet të garantohet për punonjësit që është 26 mijë lekë, e dyta protokolli i kuq që është aprovuar së fundmi që është i pazbatueshëm në praktikë megjithëse bie ndesh edhe me trendin e masave lëshuese që po ndjek qeveria shqiptare për shoqërinë tonë, dizenfektimi i ambjenteve tona të konsiderohen ambjente publike dhe të dizinfektohenme standarde shtetërore dhe të jetë shteti përgjegjës dhe në logjistikë dhe financiarisht sa i përket dizenfektimit të ambjenteve tona dhe së katërti të lirohet transporti publik në fashat e orareve që punonjësit vinë dhe largohen nga puna, në mëngjes dhe drekë”, tha Gjika për Oranews.
Sipas tij, Presidenti gjeti mirëkuptimin e plotë dhe bashkë me ekspertët që ishin aty ra dakord që të negociojë me qeverinë për këto katër pika.
