Kryebashkiaku Erjon Veliaj njoftoi pak muaj më parë shembjen e shkollës Sami Frashëri, si një nga objektet e dëmtuara nga tërmeti i 26 nëntorit.
Ndërkohë që në ditët e fundit, kur vendi ndodhet në një karantinë bazuar në vendimet e Qeverisë, që i lejon qytetarët të lëvizin vetëm 90 minuta përmes një fashe orare nga ora 05:00-17:30, duke aplikuar për leje daljeje, Veliaj nisi punën për shembjen e objektit.
Shkolla Sami Frashëri ishte një nga instiitucionet arsimore që u rikonstruktua në vitin 2018 nga Bashkia e Tiranës, madje Veliaj në atë kohë fliste me superlativa për punën që ishte bërë dhe tregonte objektet e tjera arsimore që do të rikonstruktoheshin.
Sot pas dy vjetësh i gjithë investimi i Veliajt në këtë shkollë u gropos bashkë me godinën.
Shembja e objektit shkaktoi reagime të shumta, ndërsa Veliaj ka premtuar ndërtimin e shkollës së re brenda dy vitesh.
Por dy vjet më parë për rikonstruksionin e shkollës së mesme u shpenzuan 2 milionë euro, ndërsa nga organi i akuzës nuk pati ndonjë hetim lidhur me faktin se si u shpërdoruan këto para në këtë objekt, qe sot është rrafshuar.
E vetmja e përbashkët është fakti se si në kohën e rikonstruksionit ashtu edhe të shembjes së shkollës, Veliaj ka përgatitur me dhjetra kronika televizive, ku dikur fliste për një institucion arsimor bashkëkohor dhe sot tregon se si do të jetë ai kur të rindërtohet.
