Edhe pse futbolli prej shumë kohësh tashmë është i pezulluar, puna e klubeve për të gjetur elementë cilësorë për të përforcuar skuadrat nuk ndalet për asnjë moment.
Në këtë vorbull zërash është edhe sulmuesi anësor i Partizanit, Erald Çinari, që flitet se është shumë pranë kalimit te turqit e Menemensporit.
“Haberturk.com” madje ka deklaruar se futbollisti shkodran do të jetë përforcimi i parë për Menemenspor gjatë merkatos së verës.
Në lidhje me këto zëra merkatoje ka reaguar vetë, Çinari, i cili në një intervistë për “Panorama Sport” ka sqaruar se si qëndron e vërteta.
“Nuk është hera e parë që flitet për mua për një kalim të mundshëm te Menemenspori. Sa i përket lajmit se gjithçka është mbyllur, mund të them se kjo nuk qëndron, pasi bëhet fjalë thjesht për një interesim, i cili vijon prej kohësh nga klubi turk. Ndaj, edhe në këto momente situata është në kuadrin e interesimit, jo se ka akord final mes palëve”, u shpreh Erald Çinari për “Panorama Sport”.
