Holanda ndalon të gjitha aktivitetet sportive dhe natyrisht edhe futbollin profesionist, të paktën deri në shtator.
Ky lajm u dha mbrëmjen e sotme në një konferencë për shtyp nga kryeministri i vendit, Mark Rute, i cili renditi masat e reja të marra për shkak të pandemisë së koronavirusit.
Shkollat do të rihapen gradualisht nga 11 maji, por për aktivitetet sportive është vendosur që të ndalohen deri më 1 shtator.
Kampionati holandez është ndërprerë që në fillim të muajit mars, ndërsa për të përfunduar sezonin duhen luajtur edhe 9-të ndeshje. Ajaksi kryeson tabelën e klasifikimit falë golaverazhit më të mirë krahasuar me AZ Alkmaar të vendit të dytë.
Për shtypin holandez, ky vendim i jep fund sezonit 2019-2020.
