Qeveria e Spanjës ka miratuar një draftligj që kufizon duhanpirjen në vende publike dhe që mund të ketë ndikim të rëndësishëm tek turistët. Legjislacioni i propozuar do të ndalojë duhanpirjen, përdorimin e cigareve elektronike, produkteve bimore, pajisjeve për ngrohjen e duhanit dhe substancave të tjera në hapësira të jashtme. Këto zona përfshijnë stadiumet sportive, plazhet, tarracat e restoranteve dhe bareve, hapësirat ku luajnë fëmijët dhe institucionet arsimore.
“Ne gjithmonë do të vendosim shëndetin publik mbi interesat privatë,” thanë burime nga ministria e Shëndetësisë. “Çdokush ka të drejtë të qëndrojë në ajër të pastër dhe të jetojë më gjatë dhe më shëndetshëm.”
Masat e propozuara kanë shkaktuar kundërshtime nga pronarët e restoranteve dhe bareve, të cilët thonë se kultura e ngrënies në ambiente të jashtme gjatë gjithë vitit në Spanjë mbështetet shumë nga klientët që pinë duhan. Ndalimi i duhanit në ambiente të mbyllura është në fuqi që nga viti 2011.
Drafti mund të ndryshojë ndjeshëm përvojën e turistëve që vizitojnë destinacionet e njohura të Spanjës. Atraksioni i vendit për udhëtarët ka përfshirë tradicionalisht jo vetëm klimën dhe kulturën, por edhe disponueshmërinë e produkteve të duhanit pa taksa dhe çmimet më të ulëta të cigareve.
Ligji gjithashtu kërkon kontrolle më të rrepta mbi marketingun dhe shpërndarjen e produkteve të “vaping” dhe cigareve elektronike. Nuk ka ende një datë të saktë se kur këto masa do të hyjnë në fuqi, pasi drafti duhet të miratohet nga parlamenti dhe mund të pësojë ndryshime.
Qasja e Spanjës pasqyron veprime të ngjashme të ndërmarra nga Franca në muajin korrik. Kjo nismë pasqyron një trend më të gjerë evropian drejt rregullave më të ashpra ndaj duhanit, pavarësisht se kontinenti shënon nivelet më të larta të duhanpirjes tek të rriturit, me rreth 25 përqind.
Të dhënat nga departamenti i shëndetësisë tregojnë se mbi 50,000 persona humbin jetën çdo vit në Spanjë për shkak të duhanit, apo rreth 137 vdekje në ditë.
