Qeveria ka harruar se gjysma e popullsisë jeton në fshat

Nga Klodian Tomorri

Qeveria ka hyre tashmë zyrtarisht në  biznesin e shpërndarjes së parave publike. Pas dy skemave të mëparshme që targetojnë rreth 235 mijë individë të punësuar dhe vetëpunësuar në biznesin e vogël, apo persona të cilët kanë humbur punë, kryeministri lajmëroi një tjetër paketë transfertash cash. Ketë herë bëhet fjalë për 70 mijë individë aplikantë të skualifikuar nga ndihma ekonomike, të cilët do të marrin një pagesë të vetme me gjasa rreth nivelit 10 mijë lekë.

Në total, nga të tre skemat e ndihmës direkte përfitojnë para në dore rreth 300 mijë individë. Fondi total që shpërndahet sipas të dhënave të bëra publike nga qeveria shkon në 140 milionë dollarë ose 1 për qind e Prodhimit Kombëtar duke përfshirë dhe rritjen e pagesës së papunësisë. Por në të gjithë këtë paketë, gjysma e popullsisë që jeton në fshat nuk do të përfitojë thuajse asgjë.

Teksa pandemia është duke gjunjëzuar ekonominë botërore, shumica e qeverive kanë treguar kujdes të vecantë për fermerët, si një nga hallkat më kritike të ekonomisë, për të mbajtur të pacënuar zinxhirin e furnizimit ushqimor. Në Shtetet e Bashkura të Amerikës, përvec pagesës direkte në dorë prej 1200 dollarësh, qeveria federale ka aprovuar dhe skema të posaçme ndihme për fermerët që përfshijnë paketa grantesh dhe kredish.

LEXO EDHE  Edi Rama mes Ard Veliut dhe Ard Daullxhiut

Komisioni Europian gjithashtu miratoi pak ditë më parë një paketë të zgjeruar për sektorin agroushqimor, duke mbështetur me pagesa direkte, grante por edhe skema kredish të zbutura fermerët dhe bizneset e peshkimit. Vec kësaj pakete në nivel europian, qeveritë kombetare kanë miratuar të tjera skema mbështetje për fermerët e vendeve të tyre për të minimizur pasojat negative të krizës.

Ekonomia bujqësore në Shqipëri po përballet me vështirësi njësoj si të gjithë fermerët e vendeve të tjera. Por teksa, qeveritë në çdo cep të planetit miratuan me shpejtësi paketa financiare për t’u ardhur në ndihmë bujqërve, në Shqipëri fermerët jo vetëm që nuk kanë përfituar asnjë qindarkë, por po përballen me kufizimet shpesh absurde që imponojnë institucionet.

Sot nëper fermat e Shqipërisë policia e shtetit ndalon lëvizjen e makinerive bujqësore. Shumë fermerë që i kanë fermat larg banesave nuk lejohen të shkojnë në punë. Kjo ka pasoja të pallogaritshme negative. Funksionimi normal i zinxhirit të furnizimit ushqimor nis nga fshati. Kjo është një çështje kritike për ekonominë dhe madje edhe sigurinë kombëtare. Por deri më tani, qeveria e Shqiperisë ka harruar se gjysma e popullsisë jeton në fshat.