Në një seancë të zhvilluar në kushte të jashtëzakonshme, ku ligjvënësit ndodheshin në sallën qendrore, lozha dhe në pjesën e sipërme, atje ku zakonisht qëndrojnë mediat, Kuvendi miratoi 12 Aktet Normative të Qeverisë, ndryshimet në Kodin Penal, që sanksionojnë burg për shkelësit e karantinës, sikundër rrëzoi edhe dy dekretet e Presidentit, njëri për Pronat dhe tjetri për ligjin anti-KÇK.
Ende nuk dihet se sa deputetë kanë votuar pro Akteve Normative dhe ndryshimeve në Kodin Penal, apo sa prej tyre votuan kundër dekreteve të Presidentit që kërkonte rishqyrtimin e ligjeve nga Kuvendi.
Gjithashtu propozimet e Presidentit që masat e reja që parashikojnë burg në Kodin Penal duhet të jenë në respeckt të dispozitave Kushtetuese dhe Konventës së Mbrojtjes së të Drejtave të Njeriut, nuk janë marrë parasysh nga Kuvendi që miratoi ndryshimet, sipas variantit të Komisionit të Ligjeve.
Kryeministri Edi Rama mbajti një fjalim në Kuvend ku sulmoi kritikët dhe mediat, ndërsa tha se për shkak të masave të marra nga Qeveria, u shpëtuan 2800 jetë njerëzish nga epidemia e Covid 19. Nuk dihet se në cilat studime bazohet Rama kur flet për shifra të tilla, që përkojnë me rreth 1000 vdekje për 1 milionë banorë, vdekshmëri kjo që nuk përputhet me asnjë statistikë të asnjë vendi deri më sot.
Po kështu në teorinë e tij, për jetët e shpëtuara, Rama iu referua projeksioneve të atyre që i konsideron si ekspertë të pavarur, sipas të cilave në Shqipëri nëse nuk do të merreshin masat do të kishte 18 mijë jetë të humbura.
Rama u shfaq i tensionuar në Kuvend, duke vijuar përhapjen e panikut teksa fliste për bomba, që sipas tij, janë të prekurit nga koronavirusi.
“Janë bomba që shpërndahen, pse ca kanë bombat më shumë, kur ke njerëz që infektohet shkojnë në spital, pastaj në intubim dhe nuk dihet a dalin apo jo nga intubimi. Bomba çfarë të bën më shumë”, u shpreh Rama.
