Kryeministri Edi Rama tha se po përgatitet programi i hapjes graduale, por shtoi se gjithçka do të jetë strikt.
Rama tha se restorantet dhe baret do të jenë të fundit që do të happen, ndërsa shtoi se së shpejti do të vihet në përdorim një aplikacion i ri që do të lehtësojë pajisjen me autorizime të drejtuesve të automjeteve.
“Gjithkush që ka një automjet dhe që me të lëviz për të shkuar në punë, ka një fashë orare lëvizjeje nga ora 05:00-08:00 dhe 16:00-17.30 për tu kthyer në shtëpi.
Do të krijojmë fasha orare për ata që e kanë punën me turne”, tha Rama, duke shtuar se nuk do të tolerohen më rastet kur qytetarët marrin një leje qarkullimi dhe dalin nëpër qytete duke bërë shëtitje.
Gjithashtu Kryeministri paralajmëroi se po përgatitet një paketë ndihme edhe për ata që punojnë në të zezë, por i ftoi këta qytetarë që të denoncojnë pronarët e tyre. Madje në këtë kuadër ai tha se po mendohet të vendoset edhe një shpërblim për rastet e denoncimeve.
Rama tha se në Kodin Penal do të përfshihen edhe rastet e shkeljes së karantinës në kushtet e epidemive.
“Nuk do të lejojmë askënd që këtë luftën e madhe dhe sakrificën e madhe që po bëjmë me armikun e padukshëm të na e hedhin në erë disa individë që s’duan të zbatojnë rregullat”, tha Rama.
