Një student 23-vjeçar humbi jetën të shtunën si pasojë e një aksidenti që ndodhi në Tiranë. Viktima, Reldi Guga, ishte me biçikletë, kur u përfshi në një aksident me një kamion që transportonte materiale ndërtimi.
Ngjarja ka ndodhur pranë tregut të “Uzinës Dinamo”, ku një shofer kamioni me bylyk që po fuste materiale ndërtimi dhe hekur në pallatin brenda tregut, ka shtypur studentin i cili po lëvizte me biçikletë.
Në vendngjarje ka mbërritur policia e cila shoqëruar drejtuesin e kamionit për zbardhjen e hetimit të këtij aksidenti të rëndë.
Aksidenti i rëndë merr përmasa të tjera po të kihet parasysh fakti se vendi ndodhet nën masa ekstreme të qarkullimit, qoftë për kalimtarët ashtu edhe për automjetet.
Për të qarkulluar duhet të pajisesh me një leje të posaçme, që aplikohet online ose me sms dhe më pas ajo konfirmohet nga strukturat e Policisë së Shtetit, përfshi këtu edhe ato të Policisë Rrugore në rastin e automjeteve.
Nuk dihet nëse për aksidentin në fjalë mbajnë përgjegjësi drejtuesit e qarkullimit rrugor që lejojnë mjete të tilla për të qarkulluar, apo që i pajisin me leje.
Duket se në kuadrin e masave, që janë në dorën e Kryeministrit, duhet të rishikohet klasifikimi i mjeteve që lejohet të qarkullojnë, veçanërisht kur bëhet fjalë për automjete të tilla.
