Zgjidhet situata me shqiptarët e mbetur në kufirin e gjelbër mes Shqipërisë dhe Greqisë, në pikën e Kalimit Kufitar të Kapshticës.
Sikundër raportohet, 8 shtetas shqiptarë, të cilët prej ditësh kishin mbetur në zonën e kufirit të gjelbur, janë lejuar të futen në territorin shqiptar, pasi kanë pranuar të karantinohen në një hotel.
Mësohet se akomodimi i tyre në hotel do të bëhet me shpenzimet e vetë shtetasve shqiptarë, që ishin emigrantë në Greqi dhe kryenin punë sezonale.
Fillimisht ato i janë nënshtruar kontrolleve mjekësore dhe më pas në mënyrë të organizuar janë transportuar drejt hotelit.
Prej mbrëmjes së të premtes një grup emigrantësh shqiptarë u lejuan nga autoritetet greke të kalonin kufirin, por autoritetet shqiptare nuk lejuan futjen e tyre në territor me pretendimin se kufinjtë ishin mbyllur për shkak të pandemisë së koronavirusit.
Pas disa ditë negociatash u lejua grupi i parë, kryesisht të moshuar dhe të sëmurë, që u transportuan me ambulanca në spitalin rajonal të Korçës dhe Bilishtit.
Më pas një tjetër grup u akomoduan në një hotel në Korçë, ku do të qëndrojnë të karantinuar për 14 ditë dhe grupi i fundit me 8 shqiptarë arriti të kalonte sot pikën e kalimit kufitar.
