Mjeku nga Kosova Hakif Hoxha ka propozuar përdorimin e plazmës së personave të shëruar nga Covid për tu injektuar antitrupa personave të tjerë të sëmurë.
Në një lidhje për edicionin e lajmeve në RTV Ora, mjeku sqaroi procedurën e metodës së injektimit të plazmës, duke thënë se plazma e personave të shëruar përmban antitrupat e nevojshëm që të luftojnë Covid-19.
Pyetje: Ju keni propozuar përdorimin e plazmës së të shëruarve nga covid-19 me antitrupat e krijuar, një teori që është mbështetur nga gjermania dhe SHBA, ku konsiston kjo teori dhe a mundet realisht të shpëtojë jetë.
Hakif Hoxha: Ideja ime nuk është e re, kjo ide është aplikuar që në 1890. Është përdorur edhe në epidemin e gripit. Në 2014 thuhet që përdorimi i plazmës së pacientëve të shëruar e ka ulur 30% vdekshmërinë nga Ebola. Ka dhënë rezultate. Esenca e gjithë kësaj është që kjo duhet të përdoret dhe mund të përdoret në Shqipëri dhe Kosovë.
Në plazmën e personave të shëruar prej covid-19 qarkullojnë antitrupa specifik, të cilët lidhin, targetojnë dhe neutralizojnë virusin në mënyrë që ai të mos futet në qelizat tona. Pra qëllimi i këtij mjekimi është që të merret plazma e të shëruarve, të merren këta antitrupa të gatshëm dhe pacienti që është në gjendje kritike ti marrë këta antitrupa të gatshëm. Janë parë se ka përmirësime. Në literaturë ka të dhëna që dikur rreth 40% të pacientëve në gjendje kritike kanë mbijetuar falë transfuzionit të plazmës së personave të shëruar prej covidit.
