Nga Boldnews.al
Hetimet për një aksident me pasojë vdekjen e një punonjësi të “Albpetrol’it” në Kuçovë, kanë ngritur dyshime të forta për cilësinë e ulët të masave mbrojtëse për jetën dhe shëndetin e personave që punojnë në kompaninë shtetërore të naftës.
Policia ka nisur një hetim paralel për përgjegjësitë e titullaravë të “Albpetrolit”, pas arrestimit të inxhinjerit të kompanisë, 48-vjeçarit B.T., i dyshuar për kryerjen e veprës penale të “Shkeljes së rregullave në punë”, me pasojë vdekjen e një punonjësi.
Sipas burimeve nga grupi hetimor, një ditë më parë, inxhinieri B.T. ka ngarkuar tre punonjës për të vendosur një pajisje të rëndë në një prej puseve të zonës naftë-mbajtëse të Kuçovës.
Diçka ka shkuar keq dhe objekte të fuqishme kanë goditur njërin nga punëtorët, i cili humbi jetën më pas në spitalin e Beratit, për shkak të plagëve të marra.
Për këtë ngjarje, policia ka arrestuar inxhinierin, por ndërkohë po kryen verifikime të mëtejshme për të vlerësuar përgjegjësinë e ndërmarrjes shtetërore “Albpetrol”.
Nga deklarimet e marra pas aksidentit të kësaj fundjave, grupi hetimor ka mësuar se masat dhe sidomos materialet e vëna në dispozicion nga kompania “Albpetrol” janë të pamjaftueshme për të siguruar maksimalisht jetën dhe shëndetin e të punësuarve.
Këto deklarime i hapin rrugë një tjetër hetimi, atë që lidhet me rolin e titullarëve të kompanisë shtetërore të naftës në planet e sidomos në mekanizmat që kanë për të siguruar integritetin fizik të punonjësve.
Në hetime pritet të përfshihet i gjithë zinxhiri vertikal i personave përgjegjës.
